Read Bhaibheri Dzvene MuChiShona Chanhasi Mapisarema 74 Bible Online

Mapisarema 74 - Bhaibheri Dzvene MuChiShona Chanhasi bible

Mapisarema 74

¹Masikiri raAsafi. Haiwa Mwari, makatirambireiko nokusingaperi? Kutsamwa kwenyu kwapfungairireiko pamusoro pamakwai anofudzwa nemi?

²Rangarirai vanhu vamakatenga kare, rudzi rwenhaka yenyu, ivo vamakadzikinura, Gomo reZioni, pamaigara.

³Dzorai nhambwe dzenyu mutarise matongo asingaperi, kuparadza ikoku kwose kwakauya nomuvengi pamusoro penzvimbo yenyu tsvene.

⁴Vavengi venyu vakaomba panzvimbo yamakasangana nesu; vakamisa mireza yavo sechiratidzo.

⁵Vakaita savanhu vanosimudza matemo kuti vateme dondo remiti.

⁶Vakaputsa zvose zvakavezwa namatemo avo nembezo.

⁷Vakapisira pasi nzvimbo yenyu tsvene; vakamhura ugaro hweZita renyu.

⁸Vakati mumwoyo yavo, “Tichavaputsa zvachose!” Vakapisa nzvimbo dzose dzokunamatira Mwari munyika.

⁹Hatichaoni zviratidzo zvinoshamisa; hakuna muprofita akasara, pakati pedu hapana munhu anoziva kuti zvicharamba zvakadaro kusvikira rini.

¹⁰Haiwa Mwari, muvengi acharamba achikushorai kusvikira riniko? Ko, muvengi acharamba achimhura zita renyu nokusingaperi here?

¹¹Munodzoserereiko ruoko rwenyu shure, irwo ruoko rwenyu rworudyi? Rubvisei pamupendero wenguo yenyu muvaparadze!

¹²Asi imi, iyemi Mwari, ndimi mambo wangu kubva nakare; imi munouyisa ruponeso panyika.

¹³Ndimi makaganhura gungwa napakati nesimba renyu; makaputsa misoro yechikara chomumvura.

¹⁴Ndimi makapwanya misoro yaRevhiatani, mukamuita chokudya chezvisikwa zvomugwenga.

¹⁵Ndimi makazarura zvitubu nehova; mukapwisa nzizi dzaigara dzichierera.

¹⁶Zuva nderenyu, uye usiku ndohwenyuwo; makasimbisa zuva nomwedzi.

¹⁷Ndimi makatara miganhu yose yenyika; mukaita zvose zhizha nechando.

¹⁸Rangarirai kuti muvengi akakushorai sei, imi Jehovha, uye kuti mapenzi akamhura sei zita renyu.

¹⁹Regai kuisa upenyu hwenjiva yenyu kumhuka dzesango; regai kukanganwa nokusingaperi upenyu hwavanhu venyu vanonetswa.

²⁰Ivai nehanya nesungano yenyu, nokuti mweya wokurwisana wazadza nzvimbo dzerima munyika.

²¹Musarega vakadzvinyirirwa vachidududza shure nenyadzi; varombo navanoshayiwa ngavarumbidze zita renyu.

²²Simukai, imi Mwari, mutsigire mhaka yenyu; rangarirai kuti mapenzi anokushorai sei zuva rose.

²³Regai kushayira hanya ruzha rwavadzivisi venyu, bope ravavengi venyu, rinoramba richikwira.