Read Bhaibheri Dzvene MuChiShona Chanhasi Mapisarema 78 Bible Online

Mapisarema 78 - Bhaibheri Dzvene MuChiShona Chanhasi bible

Mapisarema 78

¹Masikiri raAsafi. Haiwa vanhu vangu, inzwai kudzidzisa kwangu; teererai mashoko omuromo wangu.

²Ndichashamisa muromo wangu nditaure nomufananidzo, ndichataura zvinhu zvakavanzika, zvinhu zvakare kare,

³zvatakanzwa nezvatakaziva, zvatakaudzwa namadzibaba edu.

⁴Hatingazozvivanziri vana vavo; tichaudza rudzi runotevera mabasa angarumbidzwa aJehovha, simba rake, nezvishamiso zvaakaita.

⁵Akatema zvirevo zvaJakobho akasimbisa murayiro muIsraeri, waakarayira madzitateguru edu kuti vadzidzise vana vavo,

⁶kuti rudzi runotevera ruzvizive, kunyange vana vachazoberekwa, naivo vagozoudzawo vana vavo.

⁷Ipapo vachavimba naMwari wavo uye havangazokanganwi mabasa ake asi vachazochengeta mirayiro yake.

⁸Havazofanani namadzitateguru avo, rudzi rwakanga rwakasindimara uye rwaimumukira, mwoyo yavo yakanga isingateereri Mwari, mweya yavo yakanga isina kutendeka kwaari.

⁹Vanhu vokwaEfuremu, kunyange vakanga vakapakata uta, vakadzokera shure pazuva rokurwa;

¹⁰havana kuchengeta sungano yaMwari, uye vakaramba kufamba maererano nomurayiro wake.

¹¹Vakakanganwa zvaakaita, zvishamiso zvaakavaratidza.

¹²Akaita zviratidzo pamberi pamadzibaba avo munyika yeIjipiti, mudunhu reZoani.

¹³Akapamura gungwa akavayambutsa napakati; akaita kuti mvura imire yakasimba sorusvingo.

¹⁴Akavatungamirira negore masikati, uye nechiedza chomoto usiku hwose.

¹⁵Akapamura ruware mugwenga akavapa mvura yakawanda seyamakungwa;

¹⁶akabudisa hova dzemvura paruware akaita kuti iyerere seyenzizi.

¹⁷Asi vakaramba vachingomutadzira, vachimukira Wokumusoro-soro mugwenga.

¹⁸Vakaedza Mwari nobwoni vachimugombedzera kuti avape zvokudya zvavaipanga.

¹⁹Vakapopotera Mwari, vachiti, “Ko, Mwari angawadzira tafura mugwenga here?

²⁰Paakarova dombo, mvura yakatubuka, uye hova dzakayerera mvura zhinji. Asi angagona kutipawo zvokudya here? Angavigira vanhu vake nyama here?”

²¹Jehovha akati avanzwa, akatsamwa zvikuru kwazvo; moto wake ukaveserwa Jakobho, uye hasha dzake dzikamukira Israeri,

²²nokuti havana kutenda muna Mwari kana kuvimba nokurwira kwake.

²³Asi akarayira matenga kumusoro akazarura makonhi okumatenga;

²⁴akanayisa mana kuti vanhu vadye, akavapa zviyo zvokudenga.

²⁵Vanhu vakadya chingwa chavatumwa; akavatumira zvokudya zvose zvavaigona kudya.

²⁶Akazarura mhepo yokumabvazuva kubva kudenga, uye akafambisa mhepo yakabva zasi nesimba rake.

²⁷Akavanayisira nyama pamusoro pavo seguruva, shiri dzinobhururuka dzakaita sejecha rokumhenderekedzo yegungwa.

²⁸Akaita kuti dziburukire mumisasa yavo, dzakapoteredza matende avo ose.

²⁹Vakadya kusvikira vaguta kwazvo, nokuti akanga avapa zvavakanga vachipanga.

³⁰Asi vasati vafuratira chokudya chavaikarira, kunyange pachakanga chichiri pamiromo yavo,

³¹kutsamwa kwaMwari kwakavamukira; akauraya vakanga vakanyanya kusimba pakati pavo, akaparadza majaya eIsraeri.

³²Kunyange zvakadaro, vakaramba vachingotadza; kunyange zvazvo zviratidzo zvake izvi zvaivapo, havana kutenda.

³³Saka akagumisa mazuva avo nezvisina maturo, uye makore avo mukutya.

³⁴Pose pavaiurayiwa naMwari, ndipo pavaimutsvaka; vaishingairira kudzokerazve kwaari.

³⁵Vakarangarira kuti Mwari ndiye Dombo ravo, kuti Mwari Wokumusoro-soro ndiye Mudzikinuri wavo.

³⁶Asizve vaingomubata kumeso nemiromo yavo, vachimurevera nhema nendimi dzavo;

³⁷mwoyo yavo yakanga isina kutendeka kwaari, vakanga vasina kutendeka pasungano yake.

³⁸Kunyange zvakadaro iye akavanzwira tsitsi; akavakanganwira kuipa kwavo akasavaparadza. Nguva nenguva akadzora kutsamwa kwake, uye haana kumutsa hasha dzake dzose.

³⁹Akarangarira kuti ivo vaingova nyama bedzi, mhepo inopfuura isingadzoki.

⁴⁰Vakamumukira mugwenga kazhinji sei, uye vakamuitisa shungu murenje!

⁴¹Vakaedza Mwari vamuedzazve; vakagumbusa Iye Mutsvene waIsraeri.

⁴²Havana kurangarira simba rake, zuva raakavadzikinura kubva pamudzvinyiriri,

⁴³zuva raakaratidza zviratidzo zvake zvinoshamisa muIjipiti, zvishamiso zvake mudunhu reZoani.

⁴⁴Akashandura nzizi dzavo dzikava ropa; havana kugona kunwa muhova dzavo.

⁴⁵Akavatumira mapupira enhunzi dzikavaparadza, uye matatya akavaparadza zvikuru.

⁴⁶Akapa zviyo zvavo kumagutaguta nezvibereko zvavo kumhashu.

⁴⁷Akaparadza mazambiringa avo nechimvuramabwe, uye namaonde emionde yavo nechando.

⁴⁸Mombe dzavo akadziisa kuchimvuramabwe, nezvipfuwo zvavo kukurova kwemheni.

⁴⁹Akaregedzera kutsamwa kwake kukuru pamusoro pavo, hasha dzake, shungu dzake noukasha hwake, boka ravatumwa vokuparadza.

⁵⁰Akagadzira nzira yokutsamwa kwake; haana kuponesa mweya yavo parufu asi akavaisa kudenda.

⁵¹Akauraya matangwe ose eIjipiti, chibereko chokutanga chomurume pamatende aHamu.

⁵²Asi akabudisa vanhu vake seboka ramakwai; akavatungamirira samakwai nomugwenga.

⁵³Akavafambisa norugare, asi gungwa rakamedza vavengi vavo.

⁵⁴Saizvozvo akavasvitsa kumuganhu wenyika yake tsvene, kunyika yamakomo yaakatora noruoko rwake rworudyi.

⁵⁵Akadzinga ndudzi mberi kwavo, akagovera nyika yavo kwavari senhaka; akagarisa rudzi rwaIsraeri mudzimba dzavo.

⁵⁶Asi vakaedza Mwari uye vakamukira Wokumusoro-soro; vakasachengeta zvirevo zvake.

⁵⁷Vakanga vasingazvirereki uye vasina kutendeka samadzibaba avo, vasingavimbiki souta hunonyengera.

⁵⁸Vakamutsamwisa nenzvimbo dzavo dzakakwirira; vakamutsa godo rake nokuda kwezvifananidzo zvavo.

⁵⁹Mwari akati avanzwa akatsamwa zvikuru kwazvo; akaramba Israeri zvachose.

⁶⁰Akasiya tabhenakeri yeShiro, iyo tende yaakanga amisa pakati pavanhu.

⁶¹Akaendesa areka yesimba rake kuutapwa, kubwinya kwake mumaoko omuvengi.

⁶²Akaisa vanhu vake kumunondo; akatsamwira nhaka yake zvikuru kwazvo.

⁶³Moto wakaparadza majaya avo, uye varandakadzi vavo vakashayiwa nziyo dzesvitsa;

⁶⁴vaprista vavo vakanga vaiswa kumunondo, uye chirikadzi dzavo hadzina kugona kuchema.

⁶⁵Ipapo Ishe akamuka somunhu anga akakotsira, somunhu amuka pakubatwa newaini.

⁶⁶Akarova vavengi vake vakadzokera shure; akavanyadzisa nokusingaperi.

⁶⁷Ipapo akaramba matende aJosefa, haana kusarudza rudzi rwaEfuremu;

⁶⁸asi akasarudza rudzi rwaJudha, Gomo reZioni, raakada.

⁶⁹Akavaka nzvimbo yake tsvene senhare yakakwirira, senyika yaakasimbisa nokusingaperi.

⁷⁰Akasarudza Dhavhidhi muranda wake, akamutora kumatanga amakwai;

⁷¹akamubvisa pakufudza makwai kuti ave mufudzi wavanhu vake Jakobho, vaIsraeri nhaka yake.

⁷²Uye Dhavhidhi akavafudza nokururama kwomwoyo; akavatungamirira namaoko ouchenjeri.