Read Bhaibheri Dzvene MuChiShona Chanhasi Mapisarema 80 Bible Online

Mapisarema 80 - Bhaibheri Dzvene MuChiShona Chanhasi bible

Mapisarema 80

¹Kumutungamiri wokuimba nomuimbiro wa “Maruva amahapa eSungano.” Pisarema raAsafi. Tinzwei, imi Mufudzi weIsraeri, imi makatungamirira Josefa seboka ramakwai; iyemi munogara pachigaro choushe pakati pamakerubhi, penyai

²pamberi paEfuremu, Bhenjamini naManase. Mutsai simba renyu; uyai mutiponese.

³Tidzorei, imi Mwari, penyesai chiso chenyu pamusoro pedu, kuti tiponeswe.

⁴Haiwa Jehovha Mwari Wamasimba Ose, kutsamwa kwenyu kucharamba kuchipisa pamusoro peminyengetero yavanhu venyu kusvikira riniko?

⁵Makavapa chingwa chemisodzi kuti vadye; makaita kuti vanwe misodzi yakawanda.

⁶Makatiita mavambo enharo kuna vatigere navo, uye vavengi vedu vanotiseka.

⁷Tidzorei, imi Mwari Wamasimba Ose; penyesai chiso chenyu pamusoro pedu, kuti tiponeswe.

⁸Makabudisa muzambiringa kubva muIjipiti; makadzinga ndudzi mukaudyara.

⁹Makaukurira nzvimbo, uye ukava nemidzi ukazadza nyika.

¹⁰Makomo akanga akafukidzwa nomumvuri wawo, nemisidhari mikuru namatavi awo.

¹¹Wakatandavadza matavi awo kusvikira kuGungwa, namabukira awo kusvikira kuRwizi.

¹²Seiko makaputsa masvingo awo kuti vose vanopfuura napo vanonge mazambiringa awo?

¹³Nguruve dzinobva musango dzinouparadza, uye zvisikwa zvesango zvinoudya.

¹⁴Dzokerai kwatiri, imi Mwari Wamasimba Ose! Tarirai muri kudenga muone! Rindai muzambiringa uyu,

¹⁵iwo mudzi wakasimwa noruoko rwenyu rworudyi, mwanakomana wamakazvirerera.

¹⁶Muzambiringa wenyu watemerwa pasi, wapiswa nomoto; pakutuka kwenyu, vanhu venyu vanofa.

¹⁷Ruoko rwenyu rworudyi ngarugare pamusoro pomunhu ari kurudyi kwenyu, mwanakomana womunhu wamakazvirerera.

¹⁸Ipapo hatingazobvi kwamuri; timutsiridzei, tigodana kuzita renyu.

¹⁹Tidzorei, imi Mwari Wamasimba Ose; penyesai chiso chenyu pamusoro pedu, kuti tiponeswe.