Read Bhaibheri Dzvene MuChiShona Chanhasi Mapisarema 81 Bible Online

Mapisarema 81 - Bhaibheri Dzvene MuChiShona Chanhasi bible

Mapisarema 81

¹Kumutungamiri wokuimba. Namaimbirwo egititi. Pisarema raAsafi. Imbirai Mwari nomufaro iye simba redu; danidzirai kuna Mwari waJakobho!

²Vambai rwiyo, muridze tambureni, ridzai mbira dzinonakidza nomutengeranwa.

³Ridzai runyanga rwehwai paKugara kwoMwedzi, uye pakuchena kwomwedzi, pazuva roMutambo wedu;

⁴ichi ndicho chirevo chaIsraeri, chakatarwa naMwari waJakobho.

⁵Akachisimbisa somutemo wakanyorwa waJosefa panguva yaakandorwa neIjipiti, uko kwatakanzwa mutauro watakanga tisinganzwisisi.

⁶Iye anoti, “Ndakabvisa mutoro pamapfudzi avo; maoko avo akasunungurwa padengu.

⁷Pakutambudzika kwako wakadana ini ndikakununura, ndakakupindura ndiri mugore rokutinhira; ndakakuedza pamvura zhinji yeMeribha. Sera

⁸“Inzwai, imi vanhu vangu, uye ndichakuyambirai, kana mukada chete kunditeerera, imi Israeri!

⁹Pakati penyu ngaparege kuva namwari wavatorwa, musapfugamira mwari wokumwe.

¹⁰Ndini Jehovha Mwari wako, akakubudisa kubva munyika yeIjipiti. Shamisa muromo wako kwazvo, ndigouzadza.

¹¹“Asi vanhu vangu havana kuda kundinzwa, Israeri haana kuda kuzviisa pasi pangu.

¹²Saka ndakavaregera paukukutu hwemwoyo yavo, kuti vatevere mano avo.

¹³“Kana vanhu vangu vakada kunditeerera, kana Israeri akada kutevera nzira dzangu,

¹⁴ndaikurumidza kukunda sei vavengi vavo nokurova vavengi vavo noruoko rwangu!

¹⁵Vaya vanovenga Jehovha vachatya pamberi pake, uye kurangwa kwavo kuchagara nokusingaperi.

¹⁶Asi imi muchagutswa nezviyo zvakaisvonaka; uye ndichakugutsai nouchi hunobva padombo.”