Read Bhaibheri Dzvene MuChiShona Chanhasi Mapisarema 83 Bible Online

Mapisarema 83 - Bhaibheri Dzvene MuChiShona Chanhasi bible

Mapisarema 83

¹Rwiyo. Pisarema raAsafi. Haiwa Mwari, regai kunyarara; musanyarara, imi Mwari, musati mwiro.

²Tarirai kumutswa kwaitwa vavengi venyu, namasimudziro avaita misoro yavo.

³Vakarangana nounyengeri pamusoro pavanhu venyu; vanorangana pamusoro paavo vamunochengeta zvakanaka.

⁴Ivo vanoti, “Uyai, ngativaparadzei sorudzi, kuti zita raIsraeri rirove.”

⁵Vanorangana pamwe chete nomwoyo mumwe chete; vanoita sungano yokuzorwa nemi,

⁶matende eEdhomu nevaIshumaeri, neMoabhu navaHagari,

⁷Gebha, Amoni neAmareki, Firistia, navanhu veTire.

⁸Kunyange neAsiria yabatana navo kuti vasimbise zvizvarwa zvaRoti. Sera

⁹Muvaitire sezvamakaitira vaMidhia, sezvamakaita kuna Sisera naJabhini paRwizi Kishoni,

¹⁰ivo vakafira paEndori uye vakava sendove pamusoro pevhu.

¹¹Muite makurukota avo saOrebhu naZibhi, machinda avo ose saZebha naZarumuna,

¹²ivo vakati, “Handei tindotora mafuro aMwari.”

¹³Haiwa Mwari wangu, vaitei sendira, sehundi inodzingwa nemhepo.

¹⁴Somoto unopisa sango kana moto unoririma mugomo,

¹⁵saka vateverei nedutu renyu mugovavhundutsa nokutinhira wenyu.

¹⁶Fukidzai zviso zvavo nenyadzi kuti vanhu vagotsvaka zita renyu, imi Jehovha.

¹⁷Ngavarambe vachinyadziswa uye vavhundutswe; ngavafire munyadzi dzavo.

¹⁸Ngavazive kuti imi, mune zita rinonzi Jehovha, ndimi moga Wokumusoro-soro ari pamusoro penyika yose.