Read Bhaibheri Dzvene MuChiShona Chanhasi Mapisarema 88 Bible Online

Mapisarema 88 - Bhaibheri Dzvene MuChiShona Chanhasi bible

Mapisarema 88

¹Rwiyo. Pisarema ravanakomana vaKora. Kumutungamiri wokuimba namaimbirwo emaharati reanoti. Masikiri raHemani muEzrahi. Haiwa Jehovha, Mwari anondiponesa, ndakachema masikati nousiku pamberi penyu.

²Munyengetero wangu ngausvike pamberi penyu; rerekerai nzeve yenyu kukuchema kwangu.

³Nokuti mweya wangu uzere nokutambudzika, uye upenyu hwangu hwaswedera pedyo neguva.

⁴Ndinoverengwa pakati paavo vakaburukira kugomba; ndava somunhu asina simba.

⁵Ndakatsaurwa pamwe chete navakafa, savakaurayiwa vavete muguva, vamusingacharangaririzve, vakagurwa kubva pakuchengeta kwenyu.

⁶Makandiisa mugomba rakadzika dzika, murima guru makadzika dzika.

⁷Hasha dzenyu dzinorema kwazvo pamusoro pangu, makandifukidza namafungu enyu ose. Sera

⁸Makanditorera shamwari dzangu dzapedyo, uye mukandiita chinhu chinonyangadza. Ndakapfigirwa uye handingatongopunyuki;

⁹meso angu asviba neshungu. Ndinodana kwamuri, imi Jehovha, mazuva ose; ndinotambanudzira maoko angu kwamuri.

¹⁰Ko, munoratidza zvishamiso zvenyu kuna vakafa here? Ko, vakafa vanomuka vachikurumbidzai here? Sera

¹¹Ko, rudo rwenyu runoparidzwa muguva, nokutendeka kwenyu mukuparadzwa here?

¹²Ko, zvishamiso zvenyu zvinozivikanwa munzvimbo yerima, kana mabasa akarurama enyu munyika yokukanganwa here?

¹³Asi ndinochemera rubatsiro kwamuri, imi Jehovha; mangwanani, munyengetero wangu unosvika pamberi penyu.

¹⁴Seiko, imi Jehovha, muchindiramba uye muchindivanzira chiso chenyu?

¹⁵Kubvira pauduku hwangu, ndakatambudzika zvokutosvika pedyo norufu; ndatambudzika nokutyisa kwenyu uye handisisina tariro.

¹⁶Hasha dzenyu dzakapfuura napamusoro pangu; kutyisa kwenyu kwandiparadza.

¹⁷Zuva rose zvakandipoteredza samafashamu; ndakaputirwa nazvo chose.

¹⁸Makanditorera shamwari dzangu navadikani vangu; rima ndiyo shamwari yangu iri pedyo.