Read Bhaibheri Dzvene MuChiShona Chanhasi Mapisarema 89 Bible Online

Mapisarema 89 - Bhaibheri Dzvene MuChiShona Chanhasi bible

Mapisarema 89

¹Masikiri raEtani muEzirahi. Ndichaimba nezvorudo rukuru rwaJehovha nokusingaperi; ndichazivisa kutendeka kwenyu nomuromo wangu kuzvizvarwa zvose.

²Ndichaparidza kuti rudo rwenyu runomira rwakasimba nokusingaperi, uye kuti muchasimbisa kutendeka kwenyu kudenga chaiko.

³Imi makati, “Ndakaita sungano nomusanangurwa wangu, ndakapika kuna Dhavhidhi muranda wangu, ndichiti,

⁴‘Ndichasimbisa imba yako nokusingaperi, uye ndichasimbisa chigaro chako choushe kuzvizvarwa zvose.’ ” Sera

⁵Matenga anorumbidza zvishamiso zvenyu, imi Jehovha, kutendeka kwenyuwo muungano yavatsvene.

⁶Nokuti ndianiko kudenga kumusoro angaenzaniswa naJehovha? Ndianiko akaita saJehovha pakati pezvisikwa zvokudenga?

⁷Mwari anotyiwa zvikuru paungano yavatsvene; iye anotyisa kwazvo kupfuura vose vakamupoteredza.

⁸Haiwa Jehovha Mwari Wamasimba Ose, ndianiko akaita semi? Mune simba, imi Jehovha, uye kutendeka kwenyu kunokupoteredzai.

⁹Munotonga pamusoro pokusunda kwegungwa; mafungu aro paanosimuka, munoanyaradza.

¹⁰Makapwanya Rahabhi somumwe wavakaurayiwa; makaparadzira vavengi venyu noruoko rwenyu rune simba.

¹¹Matenga ndeenyu, nenyika ndeyenyuwo; makavamba nyika nezvose zviri mairi.

¹²Ndimi makasika kumusoro nezasi; Tabhori neHerimoni zvinoimbira zita renyu nomufaro.

¹³Ruoko rwenyu rune simba; chanza chenyu chakasimba, ruoko rwenyu rworudyi rwakasimudzwa.

¹⁴Kururama nokururamisira ndidzo nheyo dzechigaro chenyu choushe; rudo nokutendeka zvinokutungamirirai.

¹⁵Vakaropafadzwa avo vakadzidza kukurumbidzai, vanofamba muchiedza pamberi penyu, imi Jehovha.

¹⁶Vanofara muzita renyu zuva rose; vanofara mukururama kwenyu.

¹⁷Nokuti imi ndimi kubwinya nesimba ravo, uye nenyasha dzenyu munosimudzira runyanga rwedu.

¹⁸Zvirokwazvo, nhoo yedu ndeyaJehovha, mambo wedu, iye Mutsvene oga waIsraeri.

¹⁹Ipapo makataura muchiratidzo, mukati, kuvanhu venyu vakatendeka: “Ndakaisa simba pamusoro pemhare; ndakasimudzira jaya pakati pavanhu.

²⁰Ndakawana Dhavhidhi muranda wangu; ndakamuzodza namafuta matsvene.

²¹Ruoko rwangu ruchamutsigira; zvirokwazvo chanza changu chichamusimbisa.

²²Hakuna muvengi achamuripisa mutero; hakuna munhu akaipa achamudzvinyirira.

²³Ndichapwanya vavengi vake pamberi pake, uye ndicharovera pasi vadzivisi vake.

²⁴Rudo rwangu rwakatendeka ruchava naye, uye runyanga rwake ruchasimudzirwa muzita rangu.

²⁵Ndichaisa ruoko rwake pamusoro pegungwa, ruoko rwake rworudyi pamusoro penzizi.

²⁶Iye achadana kwandiri, achiti, ‘Ndimi Baba vangu, Mwari wangu, Dombo noMuponesi wangu.’

²⁷Ndichamugadzawo kuti ave dangwe rangu, iye anokudzwa zvikuru pamadzimambo enyika.

²⁸Ndichachengetedza rudo rwangu kwaari nokusingaperi, uye sungano yangu naye haitongoperi.

²⁹Ndichasimbisa imba yake nokusingaperi, uye nechigaro chake choushe chero matenga achingovapo.

³⁰“Kana vana vake vakasiya murayiro wangu, uye vakasatevera zvandakatema,

³¹kana vakazvidza mitemo yangu, uye vakakoniwa kuchengeta mirayiro yangu,

³²ndicharanga chivi chavo neshamhu, uye kuipa kwavo nokurova kukuru;

³³asi handizobvisi rudo rwangu kwavari, kana kuzombopandukira kutendeka kwangu.

³⁴Handizozvidzi sungano yangu kana kushandura zvakarehwa nemiromo yangu.

³⁵Kamwe chete, ndakapika noutsvene hwangu, uye handingarevi nhema kuna Dhavhidhi,

³⁶kuti imba yake icharamba iripo nokusingaperi uye chigaro chake choushe chichagara pamberi pangu sezuva;

³⁷chichasimbiswa nokusingaperi somwedzi, chapupu chakatendeka chiri kudenga.” Sera

³⁸Asi imi makaramba, makavenga, makatsamwira kwazvo muzodziwa wenyu.

³⁹Makaparadza sungano yomuranda wenyu uye mukasvibisa korona yake muguruva.

⁴⁰Makaputsa masvingo ake ose mukaita nhare dzake matongo.

⁴¹Vose vanopfuura napo vanomupamba; ava chiseko chavavakidzani vake.

⁴²Makasimudzira ruoko rworudyi rwavavengi vake; makaita kuti vavengi vake vose vafare.

⁴³Makadzosera shure munondo wake unopinza, uye hamuna kumutsigira pakurwa.

⁴⁴Makagumisa kubwinya kwake, mukawisira pasi chigaro chake choushe.

⁴⁵Makatapudza mazuva oujaya hwake; makamufukidza nejasi renyadzi. Sera

⁴⁶Haiwa Jehovha kusvikira riniko? Muchazvivanza nokusingaperi here? Hasha dzenyu dzichapisa somoto kusvikira riniko?

⁴⁷Rangarirai kuti upenyu hwangu hunopfuura sei. Nokuti makasikira vanhu vose zvisina maturo!

⁴⁸Ko, munhu ndoupi angararama akasaona rufu, kana angazviponesa pasimba reguva? Sera

⁴⁹Haiwa Ishe, rudo rwenyu rukuru rwekare rwuripiko, irwo rwamakapika nokutendeka kwenyu kuna Dhavhidhi?

⁵⁰Rangarirai, Ishe kuti muranda wenyu aisekwa sei, kuti ndaitakura sei muchipfuva changu kutuka kwendudzi dzose,

⁵¹kutuka uko vavengi venyu vaikusekai nako, imi Jehovha, pavaiseka nhambwe imwe neimwe yomuzodziwa wenyu.

⁵²Jehovha ngaarumbidzwe nokusingaperi! Ameni naAmeni.