Read Bhaibheri Dzvene MuChiShona Chanhasi Mapisarema 9 Bible Online

Mapisarema 9 - Bhaibheri Dzvene MuChiShona Chanhasi bible

Mapisarema 9

¹Kumutungamiri wokuimba namaimbiro o“Kufa kwoMwanakomana.” Pisarema raDhavhidhi. Ndichakurumbidzai, imi Jehovha, nomwoyo wangu wose; ndichataura pamusoro pezvishamiso zvenyu zvose.

²Ndichafara nokufarisisa mamuri; ndichaimbira zita renyu nziyo dzokurumbidza, imi Wokumusoro-soro.

³Vavengi vangu vanodzokera shure; vanogumburwa uye vanoparara pamberi penyu.

⁴Nokuti makatsigira kodzero yangu nenyaya yangu; makagara pachigaro chenyu choushe, muchitonga zvakarurama kwazvo.

⁵Makatuka ndudzi mukaparadza vakaipa; makadzima zita ravo nokusingaperi.

⁶Kuparadzwa kusina magumo kwakakunda muvengi, makadzura maguta avo; kunyange chiyeuchidzo chavo chakaparara.

⁷Jehovha anotonga nokusingaperi; akasimbisa chigaro chake choushe kuti atonge.

⁸Achatonga nyika nokururama; achatonga marudzi nokururamisira.

⁹Jehovha ndiye nhare yavakamanikidzwa, nhare yakasimba panguva yokutambudzika.

¹⁰Vanoziva zita renyu vachavimba nemi, nokuti imi, Jehovha hamuna kumbosiya avo vanokutsvakai.

¹¹Imbirai Jehovha nziyo dzokurumbidza, iye agere pachigaro choushe muZioni; paridzai zvaakaita pakati pendudzi.

¹²Nokuti iye anotsiva ropa anorangarira; haashayiri hanya kuchema kwavanotambudzwa.

¹³Haiwa Jehovha, onai kuti vavengi vangu vanonditambudza sei! Ndinzwirei ngoni mundisimudze pamasuo orufu,

¹⁴kuti ndiparidze kurumbidzwa kwenyu mumasuo oMwanasikana weZioni, uye ndigofara muruponeso rwenyu.

¹⁵Ndudzi dzakawira mugomba radzakachera; tsoka dzavo dzakabatwa nemimbure yavakaviga.

¹⁶Jehovha anozivikanwa nokururamisira kwake; vakaipa vakateyiwa namabasa amaoko avo. Higayoni. Sera

¹⁷Vakaipa vanodzokera kuguva, idzo ndudzi dzose dzinokanganwa Mwari.

¹⁸Asi vanoshayiwa havangagari vachikanganwikwa, uye tariro yavanotambudzwa haingaparari.

¹⁹Simukai, Jehovha, munhu ngaarege kukunda; ndudzi ngadzitongwe pamberi penyu.

²⁰Varovei nokutyisa, imi Jehovha; ndudzi ngadzizive kuti vanongova vanhu zvavo. Sera