Read Bhaibheri Dzvene MuChiShona Chanhasi Mapisarema 90 Bible Online

Mapisarema 90 - Bhaibheri Dzvene MuChiShona Chanhasi bible

Mapisarema 90

¹Munyengetero waMozisi munhu waMwari. Jehovha, imi makava ugaro hwedu kuzvizvarwa zvose.

²Makomo asati azvarwa uye musati mabudisa nyika nepasi rose, kubva pakusingaperi kusvikira pakusingaperi muri Mwari.

³Munodzosera vanhu kuguruva zvakare, muchiti, “Dzokerai kuguruva, imi vanakomana vavanhu.”

⁴Nokuti pamberi penyu makore chiuru akangofanana nezuva richangopfuura, kana senguva yokurinda usiku.

⁵Munokukura vanhu pakuvata kworufu; vakaita sebundo idzva ramangwanani,

⁶kunyange richimera riri idzva mangwanani, nenguva yamadekwana rinenge raoma uye rasvava.

⁷Tapera nokutsamwa kwenyu uye tinovhundutswa nehasha dzenyu.

⁸Makaisa zvakaipa zvedu pamberi penyu, makaisa zvivi zvedu zvakavanzika muchiedza chokuvapo kwenyu.

⁹Mazuva edu ose anopfuura napasi pehasha dzenyu; tinopedza makore edu nokuchema.

¹⁰Uwandu hwamazuva edu hunosvika makore makumi manomwe, kana makumi masere, kana tiine simba; kunyange zvakadaro uwandu hwawo hunongova nhamo nokusuwa, nokuti anokurumidza kupfuura, uye isu tobhururuka toenda.

¹¹Ndianiko anoziva simba rokutsamwa kwenyu? Nokuti hasha dzenyu dzakakura sokutyiwa kwakakufanirai imi.

¹²Tidzidzisei kuverenga mazuva edu zvakanaka, kuti tiwane mwoyo wouchenjeri.

¹³Dzokai, imi Jehovha! Zvichadaro kusvikira riniko? Ivai netsitsi pamusoro pavaranda venyu.

¹⁴Tigutsei mangwanani norudo rwenyu rusingaperi, kuti tigoimba nomufaro tigofara mazuva edu ose.

¹⁵Tifadzei zvinoenzana namazuva amakatitambudza, samakore mazhinji atakaona nhamo.

¹⁶Mabasa enyu ngaaratidzwe kuvaranda venyu, nokubwinya kwenyu kuvana vavo.

¹⁷Nyasha dzaIshe Mwari wedu ngadzive pamusoro pedu; tisimbisirei mabasa amaoko edu, hongu, simbisai basa ramaoko edu.