Read Bhaibheri Dzvene MuChiShona Chanhasi Mapisarema 91 Bible Online

Mapisarema 91 - Bhaibheri Dzvene MuChiShona Chanhasi bible

Mapisarema 91

¹Uyo anogara panzvimbo yokuvanda yeWokumusoro-soro achazorora mumumvuri weWamasimba Ose.

²Ndichati pamusoro paJehovha, “Ndiye utiziro hwangu nenhare yangu, Mwari wangu, wandinovimba naye.”

³Zvirokwazvo achakuponesa parugombe rwomuteyi napadenda rinouraya.

⁴Achakufukidza neminhenga yake, uye uchawana utiziro pasi pamapapiro ake; kutendeka kwake kuchava nhoo yako norusvingo rwako.

⁵Haungatyiswi nokuvhundutsa kwousiku, kana museve unopfurwa masikati,

⁶kana hosha inofamba murima, kana denda rinoparadza masikati.

⁷Chiuru chingawa parutivi rwako, zviuru gumi kurudyi pako, asi hazvingaswederi kwauri.

⁸Uchangozviona nameso ako chete, uye uchaona kurangwa kwavakaipa.

⁹Kana ukaita Wokumusoro-soro ugaro hwako, kunyange Jehovha, iye utiziro hwangu,

¹⁰ipapo hapana chakaipa chichakuwira, hakuna njodzi ichasvika patende rako.

¹¹Nokuti acharayira vatumwa vake pamusoro pako, kuti vakuchengete panzira dzako dzose;

¹²vachakusimudza mumaoko avo, kuti rutsoka rwako rurege kugumburwa padombo.

¹³Uchatsika pamusoro peshumba napamusoro pechiva; uchatsika-tsika shumba huru nenyoka.

¹⁴“Nokuti anondida,” ndizvo zvinotaura Jehovha, “neni ndichamununura; ndichamudzivirira, nokuti anoziva zita rangu.

¹⁵Achadana kwandiri, uye ndichamupindura; ndichava naye pakutambudzika, ndichamurwira uye ndichamukudza.

¹⁶Ndichamugutsa noupenyu hurefu, uye ndichamuratidza ruponeso rwangu.”