Read Bhaibheri Dzvene MuChiShona Chanhasi Mapisarema 94 Bible Online

Mapisarema 94 - Bhaibheri Dzvene MuChiShona Chanhasi bible

Mapisarema 94

¹Haiwa Jehovha, imi Mwari anotsiva, haiwa Mwari iyemi munotsiva, penyai.

²Simukai, imi Mutongi wenyika; tsivai vanozvikudza zvakavafanira.

³Haiwa Jehovha, vakaipa vachasvika riniko, vachasvika riniko vakaipa vachingofara?

⁴Vanodurura mashoko okuzvikudza; vose vanoita zvakaipa vazere nokuzvirumbidza.

⁵Vanopwanya vanhu venyu, imi Jehovha, vanodzvinyirira nhaka yenyu.

⁶Vanouraya chirikadzi nomweni; vanoponda nherera.

⁷Vanoti, “Jehovha haaoni; Mwari waJakobho haana hanya.”

⁸Nzwisisai, imi vasina njere pakati pavanhu; imi mapenzi, muchava vakachenjera riniko?

⁹Ko, iye akasima nzeve, haanganzwi here? Iye akaumba ziso haangaoni here?

¹⁰Ko, iye anoranga ndudzi haangarangi here? Anodzidzisa vanhu angashayiwa zivo here?

¹¹Jehovha anoziva mirangariro yavanhu; anoziva kuti haina maturo.

¹²Akaropafadzwa munhu anorangwa nemi, iyemi Jehovha, munhu wamunodzidzisa pamurayiro wenyu;

¹³munomuzorodza pamazuva enhamo, kusvikira akaipa achererwa gomba.

¹⁴Nokuti Jehovha haangarambi vanhu vake; haangambosiyi nhaka yake.

¹⁵Kururamisira kuchawanikwa nokuda kwevakarurama, uye vose vakarurama pamwoyo vachakutevera.

¹⁶Ndianiko achandirwira pane vakaipa? Ndianiko achandibatsira pavaiti vezvakaipa?

¹⁷Dai Jehovha asina kundibatsira, ndingadai ndakakurumidza kugara parunyararo rworufu.

¹⁸Pandakati, “Rutsoka rwangu rwotedzemuka,” rudo rwenyu, imi Jehovha, rwakanditsigira.

¹⁹Pandakava nokufunganya kukuru mandiri, kunyaradza kwenyu kwakandivigira mufaro kumweya wangu.

²⁰Ko, chigaro choushe chino uori chingashamwaridzana nemi here, icho chinouyisa kutambudzika muzvirevo zvacho?

²¹Vanobatana pamwe chete kuti varwise vakarurama, vachipomera mhosva yorufu kuna vasina mhosva.

²²Asi Jehovha ndiye ava nhare yangu, uye Mwari wangu ndiye dombo randinotizira.

²³Achavatsiva nokuda kwezvivi zvavo, uye achavaparadza nokuda kwezvakaipa zvavo; Jehovha Mwari wedu achavaparadza.