Read Bhaibheri Dzvene MuChiShona Chanhasi Mapisarema 95 Bible Online

Mapisarema 95 - Bhaibheri Dzvene MuChiShona Chanhasi bible

Mapisarema 95

¹Uyai, tiimbire Jehovha nomufaro; ngatidanidzirei kuDombo roruponeso rwedu.

²Ngatisvikei pamberi pake nokuvonga uye timukudze nenziyo.

³Nokuti Jehovha ndiye Mwari mukuru, Mambo mukuru pamusoro pavamwari vose.

⁴Nzvimbo dzakadzika dzapanyika dziri muruoko rwake, uye misoro yamakomo ndeyake.

⁵Gungwa nderake, nokuti ndiye akariita, uye maoko ake akaumba nyika yakaoma.

⁶Uyai tikotame, tinamate, ngatipfugamei pamberi paJehovha Muiti wedu;

⁷nokuti ndiye Mwari wedu, uye isu tiri vanhu vanofudzwa naye, makwai anochengetwa naye. Nhasi kana muchinzwa inzwi rake,

⁸musaomesa mwoyo yenyu sezvamakaita paMeribha, sezvamakaita pazuva riya paMasa mugwenga,

⁹pandakaedzwa namadzibaba enyu kunyange vakanga vaona zvandakanga ndaita.

¹⁰Ndakatsamwira rudzi urwu kwamakore makumi mana; ndakati, “Ava vanhu vane mwoyo yakatsauka, uye havana kuziva nzira dzangu.”

¹¹Saka ndakapika pakutsamwa kwangu ndikati, “Havangazombopindi pazororo rangu.”