Read Bhaibheri Dzvene MuChiShona Chanhasi Mapisarema 96 Bible Online

Mapisarema 96 - Bhaibheri Dzvene MuChiShona Chanhasi bible

Mapisarema 96

¹Imbirai Jehovha rwiyo rutsva; imbirai Jehovha, nyika yose.

²Imbirai Jehovha, rumbidzai zita rake; paridzai ruponeso rwake zuva nezuva.

³Paridzai kubwinya kwake pakati pendudzi, namabasa ake anoshamisa pakati pamarudzi.

⁴Nokuti Jehovha mukuru uye anofanira kurumbidzwa, iye anofanira kutyiwa pamusoro pavamwari vose.

⁵Nokuti vamwari vose vendudzi zvifananidzo, asi Jehovha akaita matenga.

⁶Kubwinya noumambo zviri pamberi pake; simba nokubwinya zviri munzvimbo yake tsvene.

⁷Remekedzai Jehovha, imi ndudzi dzose, ipai rukudzo nesimba kuna Jehovha.

⁸Ipai kuna Jehovha rukudzo rwakafanira zita rake; uyai nechipiriso mugopinda pavanze dzake.

⁹Namatai Jehovha mukubwinya kwoutsvene hwake; dederai pamberi pake, imi nyika dzose.

¹⁰Muti pakati pendudzi, “Jehovha ndiye anobata ushe.” Nyika yakanyatsosimbiswa, haingazungunuswi; uye achatonga marudzi nokururama.

¹¹Kudenga denga ngakufare, nyika ngaifarisise; gungwa ngaritinhire, nezvose zviri mariri;

¹²masango ngaafare, nezvose zviri maari. Ipapo miti yose yesango ichaimba nomufaro;

¹³ichaimba pamberi paJehovha, nokuti anouya, anouya kuzotonga nyika. Achatonga nyika nokururama, uye vanhu nechokwadi chake.