Read Bhaibheri Dzvene MuChiShona Chanhasi Zvirevo 1 Bible Online

Zvirevo 1 - Bhaibheri Dzvene MuChiShona Chanhasi bible

Zvirevo 1

¹Zvirevo zvaSoromoni mwanakomana waDhavhidhi, mambo weIsraeri:

²kuti uwane uchenjeri nokurayirwa; nokunzwisisa mashoko enjere;

³kuti uve noupenyu hwokuzvibata hune uchenjeri uchiita zvakarurama nokururamisira uye nokuenzanisira;

⁴kuti vasina mano vapiwe uchenjeri, jaya ripiwe ruzivo namano,

⁵vakachenjera ngavanzwe uye vagowedzera pakudzidza kwavo, uye vanonzvera ngavawane kutungamirirwa,

⁶kuti vanzwisise zvirevo nemifananidzo, mashoko nezvirahwe zvavakachenjera.

⁷Kutya Jehovha ndiwo mavambo ezivo, asi mapenzi anoshora uchenjeri nokurayirwa.

⁸Mwanakomana wangu, teerera, kurayira kwababa vako, uye usarasa kudzidzisa kwamai vako.

⁹Zvichava chishongo chakanaka pamusoro wako nouketani hunoshongedza mutsipa wako.

¹⁰Mwanakomana wangu, kana vatadzi vachikukwezva, usabvuma zvavari kuda kuti uite.

¹¹Kana vakati, “Handei tose; ngativandirei munhu timuuraye; ngativandirei mweya usina mhosva;

¹²ngativamedzei vari vapenyu, seguva, uye vakakwana kudaro savaya vanodzika mugomba;

¹³tichawana marudzi ose ezvinhu zvinokosha tigozadza dzimba dzedu nezvatichapamba;

¹⁴isa zvinhu zvako pamwe chete nesu, tigova nechikwama chimwe chete,”

¹⁵mwanakomana wangu, usabvumirana navo, usaisa rutsoka panzira dzavo;

¹⁶nokuti tsoka dzavo dzinomhanyira muchivi, vanokurumidza kundodeura ropa.

¹⁷Hazvibatsiri sei kutambanudza mumbure shiri dzose dzichinyatsoona!

¹⁸Varume ava vanovandira ropa ravo vomene; vanozvivandira ivo pachavo!

¹⁹Aya ndiwo magumo avaya vanotsvaka pfuma nenzira yakaipa; inouraya vaya vanoiwana.

²⁰Uchenjeri hunodanidzira nenzwi guru mumugwagwa, hunokwidza inzwi rahwo pachivara;

²¹kumusoro kwemigwagwa ine ruzha hunodanidzira, pamasuo eguta hunotaura shoko rahwo huchiti:

²²“Kusvikira riniko imi vasina mano, muchingoda kugara musina mano? Kusvikira riniko vaseki vachifarira kuseka, uye mapenzi achivenga zivo?

²³Dai makateerera kutsiura kwangu, ndingadai ndakadurura mwoyo wangu kwamuri uye ndakazivisa pfungwa dzangu kwamuri.

²⁴Asi sezvo makandiramba pandakakudanai uye pasina kana mumwe akateerera pandakatambanudza ruoko rwangu,

²⁵sezvo makashaya hanya nokurayira kwangu, uye mukasagamuchira kutsiura kwangu,

²⁶iniwo ndichaseka panguva yenjodzi yenyu; ndichaseka dambudziko parichakusvikirai,

²⁷dambudziko parichakukundai sedutu, njodzi paichavhuvhuta pamusoro penyu sechamupupuri, nhamo namatambudziko pazvichakukundai.

²⁸“Ipapo vachadana kwandiri asi ini handingavapinduri; vachanditsvaka asi havangandiwani.

²⁹Sezvo vakavenga zivo uye vakasasarudza kutya Jehovha,

³⁰sezvo vasina kugamuchira yambiro yangu, uye vakashora kutsiura kwangu,

³¹vachadya zvibereko zvenzira dzavo uye vachazadzwa nezvibereko zvemano avo.

³²Nokuti kusateerera kwavasina mano kuchavaurayisa, uye kushaya hanya kwamapenzi kuchavaparadza;

³³asi ani naani achanditeerera achagara murugare, uye achagara akasununguka, asingatyi kuparadzwa.”