Read Bhaibheri Dzvene MuChiShona Chanhasi Zvirevo 10 Bible Online

Zvirevo 10 - Bhaibheri Dzvene MuChiShona Chanhasi bible

Zvirevo 10

¹Zvirevo zvaSoromoni: Mwanakomana akachenjera anofadza baba vake, asi mwanakomana benzi anosuwisa mai vake.

²Pfuma yakawanikwa zvakaipa haibatsiri chinhu, asi kururama kunorwira parufu.

³Jehovha haatenderi akarurama kuti anzwe nzara, asi kupanga kwowakaipa anokusundira kure.

⁴Maoko ane usimbe anoita kuti munhu ave murombo, asi maoko anoshingaira anopfumisa.

⁵Anounganidza zvirimwa muzhizha, mwanakomana akachenjera, asi anorara munguva yokukohwa, mwanakomana anonyadzisa.

⁶Maropafadzo ndiwo korona yomusoro woakarurama, asi kuita nechisimba kuzere mumuromo womunhu akaipa.

⁷Kuyeukwa kwowakarurama kuchava chikomborero, asi zita rowakaipa richaora.

⁸Akachenjera pamwoyo anogamuchira mirayiro, asi benzi rinotaura zvisina maturo richaparara.

⁹Munhu akarurama anofamba akachengetedzeka, asi uyo anofamba nenzira dzakaminama achabatwa.

¹⁰Uyo anochonya neziso roruvengo anouyisa kusuwa, asi benzi rinotaura zvisina maturo richaparara.

¹¹Muromo womunhu akarurama chitubu choupenyu, asi kuita nechisimba kuzere mumuromo womunhu akaipa.

¹²Ruvengo runomutsa kupesana, asi rudo runofukidzira zvakaipa zvose.

¹³Uchenjeri hunowanikwa pamiromo yavane njere, asi shamhu yakafanira musana wouyo asina njere.

¹⁴Vanhu vakachenjera vanochengeta zivo, asi muromo webenzi unotsvaka kuparara.

¹⁵Upfumi hwavakapfuma ndiro guta ravo rina masvingo, asi urombo ndiko kuparadzwa kwavarombo.

¹⁶Mubayiro wavakarurama ndihwo upenyu, asi zvinowanikwa nowakaipa ndiko kurangwa.

¹⁷Uyo anoteerera kurayira anoratidza nzira youpenyu, asi ani naani anozvidza kudzorwa anotsausa vamwe.

¹⁸Uyo anovanza ruvengo rwake ane miromo inoreva nhema, uye ani naani anoparadzira guhwa ibenzi.

¹⁹Kana mashoko ari mazhinji, chivi hachingashayikwi, asi uyo anodzora rurimi rwake akachenjera.

²⁰Rurimi rwakarurama isirivha yakaisvonaka, asi mwoyo wowakaipa haubatsiri chinhu.

²¹Miromo yemunhu akarurama inosimbisa vazhinji, asi mapenzi anofa nokuda kwokushayiwa zivo.

²²Kuropafadza kwaJehovha kunowanisa upfumi, uye haawedzeri matambudziko kwahuri.

²³Benzi rinofadzwa nokuita zvakaipa, asi munhu anonzwisisa anofarira uchenjeri.

²⁴Zvinotyiwa nowakaipa ndizvo zvichaitika kwaari; zvinoshuviwa nowakarurama zvichapiwa kwaari.

²⁵Kana dutu rapfuura napo, vakaipa havazowanikwi, asi vakarurama vachamira vakasimba nokusingaperi.

²⁶Sevhiniga kumazino noutsi kumaziso, ndizvo zvakaita simbe kuna avo vachamutuma.

²⁷Kutya Jehovha kunowedzera mazuva kuupenyu, asi makore owakaipa achatapudzwa.

²⁸Tarisiro yowakarurama mufaro, asi tariro dzowakaipa dzichaparadzwa.

²⁹Nzira yaJehovha ndiyo utiziro hwavakarurama, asi ndiko kuparadzwa kwaavo vanoita zvakaipa.

³⁰Akarurama haangatongodzurwi, asi vakaipa havangarambi vari munyika.

³¹Muromo womunhu akarurama unobudisa uchenjeri, asi rurimi rwakaipa ruchabviswa.

³²Miromo yomunhu akarurama inoziva zvakafanira, asi muromo womunhu akaipa, zvakaipa chete.