Read Bhaibheri Dzvene MuChiShona Chanhasi Zvirevo 12 Bible Online

Zvirevo 12 - Bhaibheri Dzvene MuChiShona Chanhasi bible

Zvirevo 12

¹Ani naani anofarira kuzvirovedza anoda zivo, asi uyo anovenga kudzorwa ibenzi.

²Munhu akanaka anowana nyasha kubva kuna Jehovha, asi Jehovha anotuka munhu ane mano akaipa.

³Munhu haangasimbiswi nezvakaipa, asi mudzi womunhu akarurama haungadzurwi.

⁴Mudzimai ane unhu hwakanaka ikorona kumurume wake, asi mudzimai anonyadzisa akafanana nokuora mumapfupa omurume wake.

⁵Urongwa hwomunhu akarurama hwakarurama, asi kurayira kwavakaipa kunonyengera.

⁶Mashoko owakaipa anovandira ropa, asi kutaura kwavakarurama kunovanunura.

⁷Vanhu vakaipa vanobviswa pachigaro uye havazovapozve, asi imba yowakarurama icharamba yakasimba.

⁸Munhu anorumbidzwa maererano nouchenjeri hwake, asi vanhu vane pfungwa dzakatsauka vanozvidzwa.

⁹Zviri nani kuva munhu anoninipiswa asi iwe une muranda, pane kuzviita munhu wapamusoro iwe usina zvokudya.

¹⁰Munhu akarurama ane hanya nechipfuwo chake, asi zviito zvakanaka zvowakaipa utsinye.

¹¹Uyo anoshanda mumunda wake achava nezvokudya zvakawanda, asi uyo anongotevera zvisina maturo anoshayiwa zivo.

¹²Vakaipa vanopanga zvakapambwa zvavanhu vakaipa, asi mudzi woakarurama unobereka zvibereko.

¹³Munhu akaipa anobatwa nokutaura kwake kwakaipa, asi munhu akarurama anopunyuka padambudziko.

¹⁴Kubva pazvibereko zvemiromo yake munhu anozadzwa nezvinhu zvakanaka, zvirokwazvo sokupiwa mubayiro kwaanoitwa nebasa ramaoko ake.

¹⁵Nzira yebenzi inoita seyakanaka kwaari, asi munhu akachenjera anoteerera kurayira.

¹⁶Benzi rinoratidza kutsamwa pakarepo, asi munhu akachenjera anoshayira hanya kutukwa.

¹⁷Chapupu chezvokwadi chinopa uchapupu hwezvokwadi, asi chapupu chenhema chinoreva nhema.

¹⁸Mashoko anotaurwa nokusarangarira anobaya somunondo, asi rurimi rwomunhu akachenjera runoporesa.

¹⁹Miromo yezvokwadi ichasimbiswa nokusingaperi, asi rurimi runoreva nhema runogara kwechinguva chiduku.

²⁰Mune kunyengera mumwoyo yaavo vanoronga zvakaipa, asi rufaro rwuri kune avo vanokurudzira rugare.

²¹Akarurama haangatongowirwi nezvakaipa, asi vakaipa vachava namatambudziko akavafanira.

²²Jehovha anovenga miromo inotaura nhema, asi anofadzwa navanhu vanotaura chokwadi.

²³Munhu akachenjera anovanza zivo yake, asi mwoyo yamapenzi inotaura zvoupenzi.

²⁴Maoko anoshingaira achatonga, asi usimbe hunopedzisira mukushanda somuranda.

²⁵Mwoyo unopunyaira unoremedza munhu, asi shoko nyoro rinomufadza.

²⁶Munhu akarurama anochenjerera ushamwari, asi nzira yavakaipa inovatungamirira mukurasika.

²⁷Munhu ane usimbe haagochi mhuka yaabata, asi munhu anoshingaira anokoshesa pfuma yake.

²⁸Munzira yokururama mune upenyu; kwainoenda hakuna rufu.