Read Bhaibheri Dzvene MuChiShona Chanhasi Zvirevo 13 Bible Online

Zvirevo 13 - Bhaibheri Dzvene MuChiShona Chanhasi bible

Zvirevo 13

¹Mwanakomana akachenjera anoteerera kurayira kwababa vake, asi mudadi haateereri kana achitsiurwa.

²Kubva pazvibereko zvomuromo wake munhu achadya zvinhu zvakanaka, asi vasina kutendeka vanofarira kumanikidza.

³Uyo anobata muromo wake anochengeta upenyu hwake, asi uyo anokurumidzira kutaura achaparadzwa.

⁴Simbe inopanga asi igoshayiwa chinhu, asi zvishuvo zvavanoshingaira zvichazadziswa.

⁵Vakarurama vanovenga nhema, asi vakaipa vanouyisa kunyadziswa nokunyangadza.

⁶Kururama kunorinda munhu ane unhu hwakanaka, asi kuipa kunowisira mutadzi pasi.

⁷Mumwe munhu anozviti mupfumi, asi asina chinhu; mumwewo anozviti murombo, asi aine upfumi huzhinji.

⁸Upfumi hwomunhu hunogona kudzikinura upenyu hwake, asi murombo haana chinomutyisidzira.

⁹Chiedza cheakarurama chinopenya kwazvo; asi mwenje woakaipa uchadzimwa.

¹⁰Kuzvikudza kunongouyisa kukakavara chete, asi uchenjeri hunowanikwa mune avo vanogamuchira kurayirwa.

¹¹Mari yakawanikwa zvisakarurama ichakurumidza kupera, asi uyo anounganidza mari zvishoma nezvishoma achaita kuti iwande.

¹²Tariro kana ichinonoka inoodza mwoyo, asi chishuvo chazadziswa muti woupenyu.

¹³Uyo anozvidza kurayirwa achazozviripira izvozvo, asi uyo anokudza murayiro achawana mubayiro.

¹⁴Kudzidzisa kwowakachenjera itsime roupenyu, rinobvisa munhu pamusungo worufu.

¹⁵Kunzwisisa kwakanaka kunowanisa nyasha, asi nzira yavasina kutendeka ihukutu.

¹⁶Munhu wose akachenjera anoita zvinhu noruzivo, asi benzi rinoratidza upenzi hwaro.

¹⁷Nhume yakaipa inowira munjodzi, asi munyai akatendeka anouya nokuporesa.

¹⁸Uyo anozvidza kurayirwa achava murombo uye achanyadziswa, asi ani naani anoteerera kurayirwa achakudzwa.

¹⁹Chishuvo chazadziswa chinozipa pamweya, asi mapenzi anovenga kusiya zvakaipa.

²⁰Uyo anofamba navakachenjera achachenjerawo, asi shamwari yamapenzi ichakuvadzwa.

²¹Zvakaipa zvinotevera mutadzi, asi kubudirira ndiwo mugove wavakarurama.

²²Munhu akanaka anosiyira vana vevana vake nhaka, asi upfumi hwomutadzi hunounganidzirwa vakarurama.

²³Munda womurombo ungabereka zvokudya zvakawanda, asi kusaruramisira kunozvitsvairira kure.

²⁴Anorega kushandisa shamhu anovenga mwanakomana wake, asi uyo anomuda anochenjerera kumuranga.

²⁵Vakarurama vanodya zvinogutsa mwoyo yavo, asi dumbu reakaipa richanzwa nzara.