Read Bhaibheri Dzvene MuChiShona Chanhasi Zvirevo 14 Bible Online

Zvirevo 14 - Bhaibheri Dzvene MuChiShona Chanhasi bible

Zvirevo 14

¹Mukadzi akachenjera anovaka imba yake, asi benzi rinoputsa imba yaro namaoko aro.

²Uyo ano mufambiro wakarurama anotya Jehovha, asi uyo ano mufambiro wakatsauka anomuzvidza.

³Kutaura kwebenzi kunouyisa shamhu kumusana kwaro, asi miromo yavakachenjera inovadzivirira.

⁴Kana pasina nzombe, chidyiro hachina chinhu, asi pasimba renzombe ndipo panobva kukohwa kukuru.

⁵Chapupu chechokwadi hachinyengeri, asi chapupu chenhema chinodurura nhema.

⁶Mudadi anotsvaka uchenjeri asi anohushaya, asi ruzivo runouya zviri nyore kune anonzvera.

⁷Gara kure nomunhu benzi, nokuti haungawani ruzivo kubva pamiromo yake.

⁸Uchenjeri hwomunhu akangwara ndiko kunzwisisa nzira dzake, asi upenzi hwamapenzi ndihwo unyengeri.

⁹Mapenzi anoseka kutendeuka pazvivi, asi kuita zvakanaka kunowanikwa pakati pavakarurama.

¹⁰Mwoyo mumwe nomumwe unoziva kutambudzika kwawo, uye hapana munhu angagoverana nawo mufaro wawo.

¹¹Imba yeakaipa ichaparadzwa, asi tende rowakarurama richabudirira.

¹²Kune nzira inoita seyakanaka kumunhu, asi kumagumo inotungamirira kurufu.

¹³Kunyange mukuseka mwoyo unogona kurwadziwa, uye mufaro ungangoperera mukusuwa.

¹⁴Vasingatendi vachapiwa mubayiro wakazara wenzira dzavo, uye munhu akanaka achapiwa mubayiro wenzira dzakewo.

¹⁵Munhu asina mano anongotenda zvose zvose, asi munhu akangwara anongwarira mafambiro ake.

¹⁶Munhu akachenjera anotya Jehovha uye anovenga zvakaipa, asi benzi rina manyawi uye harina hanya.

¹⁷Munhu anokurumidza kutsamwa anoita zvinhu zvoupenzi, uye munhu anoita zvounyengeri achavengwa.

¹⁸Vasina mano vachagara nhaka youpenzi, asi vakangwara vachapfekedzwa korona yezivo.

¹⁹Vanhu vakaipa vachagwadama pamberi pavakanaka, uye vakaipa pamasuo avakarurama.

²⁰Varombo vanoraswa kunyange navavakidzani vavo, asi vapfumi vane shamwari zhinji.

²¹Uyo anozvidza muvakidzani wake anotadza, asi akaropafadzwa ane tsitsi kune vanoshayiwa.

²²Ko, vanoronga zvakaipa havarasiki here? Asi avo vanoronga zvakanaka vanowana rudo nokutendeka.

²³Kushanda nesimba kwose kunopa mubayiro, asi kungotaura kunotungamirira kuurombo bedzi.

²⁴Upfumi hwavakachenjera ikorona yavo, asi upenzi hwamapenzi hunobereka upenzi.

²⁵Chapupu chechokwadi chinoponesa upenyu, asi chapupu chenhema chinonyengera.

²⁶Uyo anotya Jehovha ane nhare yakasimba, uye ichava utiziro kuvana vake.

²⁷Kutya Jehovha ndicho chitubu choupenyu, kunodzora munhu kubva pamisungo yorufu.

²⁸Mukuwanda kwavanhu ndimo mune ukuru hwamambo, asi pasina vanhu muchinda anoparadzwa.

²⁹Munhu ane mwoyo murefu anonzwisisa, asi munhu anokurumidza kutsamwa anoratidza upenzi.

³⁰Mwoyo wakagadzikana unopa upenyu kumuviri, asi ruchiva runoodza mapfupa.

³¹Uyo anomanikidza varombo anoratidza kuti anozvidza Musiki wavo, asi ani naani ane hanya nevanoshayiwa anokudza Mwari.

³²Kana njodzi yauya, akaipa anowisirwa pasi, asi kunyange murufu akarurama ane utiziro.

³³Uchenjeri hunogara mumwoyo yavanohunzvera uye kunyange pakati pamapenzi hunozvizivisa.

³⁴Kururama kunosimudzira rudzi, asi chivi chinonyadzisa vanhu vapi zvavo.

³⁵Mambo anofarira muranda akachenjera, asi muranda anonyadzisa achatsamwirwa naye.