Read Bhaibheri Dzvene MuChiShona Chanhasi Zvirevo 15 Bible Online

Zvirevo 15 - Bhaibheri Dzvene MuChiShona Chanhasi bible

Zvirevo 15

¹Mhinduro nyoro inodzora kutsamwa, asi shoko rinorwadza rinomutsa hasha.

²Rurimi rwowakachenjera runobudisa zivo, asi muromo webenzi unodurura upenzi.

³Meso aJehovha ari pose pose, achicherechedza vakaipa navakanaka.

⁴Rurimi runouyisa kuporesa ndirwo muti woupenyu, asi rurimi runonyengera runopwanya mweya.

⁵Benzi rinoramba kurayira kwababa varo, asi ani naani anogamuchira kurayirwa anoratidza kungwara.

⁶Imba yowakarurama ine pfuma zhinji, asi zvinowanikwa nowakaipa zvinomuunzira kutambudzika.

⁷Miromo yavakachenjera inokusha zivo; asi mwoyo yamapenzi haidaro.

⁸Jehovha anovenga chibayiro chowakaipa, asi munyengetero womunhu akarurama unomufadza.

⁹Jehovha anovenga nzira yeakaipa, asi anoda vaya vanotevera kururama.

¹⁰Kurangwa kwakaomarara kwakamirira uyo anotsauka kubva panzira; uyo anovenga kudzorwa achafa.

¹¹Rufu nokuparadzwa zviri pachena pamberi paJehovha, ko, kuzoti mwoyo yavanhu!

¹²Mudadi anovenga kudzorwa; haangabvunzi vakachenjera.

¹³Mwoyo wakafara, unofadza chiso, asi mwoyo une shungu unopwanya mweya.

¹⁴Mwoyo unonzvera unotsvaka ruzivo, asi muromo webenzi unodya upenzi.

¹⁵Mazuva ose omunhu anotambudzika akaipa, asi mwoyo unofara une mutambo nguva dzose.

¹⁶Zviri nani kuva nezvishoma uchitya Jehovha, pane kuva nepfuma zhinji namatambudziko.

¹⁷Zviri nani kuva nezvokudya zvomuriwo pane rudo, pane kuva nemhuru yakakodzwa pane ruvengo.

¹⁸Munhu ane hasha anomutsa bopoto, asi munhu ane mwoyo murefu anonyaradza kukakavara.

¹⁹Nzira yesimbe yakasoswa neminzwa, asi nzira yavakarurama mugwagwa mukuru.

²⁰Mwanakomana akachenjera anounzira baba vake mufaro, asi munhu benzi anozvidza mai vake.

²¹Upenzi hunofadza munhu anoshayiwa njere, asi munhu anonzwisisa anochengetedza nzira yakarurama.

²²Urongwa hunoparara kana pasina vanopa mazano, asi vanopa mazano vakawanda hunobudirira.

²³Munhu anowana mufaro mukupa mhinduro yakanaka, uye rakanaka seiko shoko rinouya nenguva!

²⁴Nzira youpenyu kumunhu akachenjera inokwidza kumusoro, ichimuchengetedza kuti asaenda muguva.

²⁵Jehovha anoparadza imba yomunhu anozvikudza, asi agochengeta miganhu yechirikadzi yakasimba.

²⁶Jehovha anovenga pfungwa dzowakaipa, asi dzavakachena dzinomufadza.

²⁷Munhu anokara pfuma anouyisa kutambudzika kumhuri yake, asi anovenga fufuro achararama.

²⁸Mwoyo wokururama unoyera mhinduro dzawo, asi muromo woakaipa unodurura zvakaipa.

²⁹Jehovha ari kure neakaipa, asi anonzwa munyengetero weakarurama.

³⁰Chiso chinobwinya chinofadza mwoyo, uye mashoko akanaka anopa utano kumapfupa.

³¹Uyo anoteerera kutsiura kunopa upenyu achagara pakati pavakachenjera.

³²Uyo asina hanya nokurangwa anozvizvidza iye pachake, asi ani naani anogamuchira kurayira achawana kunzwisisa.

³³Kutya Jehovha kunodzidzisa munhu uchenjeri, uye kuzvininipisa kunotanga, kukudzwa kwozotevera.