Read Bhaibheri Dzvene MuChiShona Chanhasi Zvirevo 16 Bible Online

Zvirevo 16 - Bhaibheri Dzvene MuChiShona Chanhasi bible

Zvirevo 16

¹Kuronga kwomwoyo ndekwomunhu, asi mhinduro yorurimi inobva kuna Jehovha.

²Nzira dzose dzomunhu dzinoita sedzakanaka pakuona kwake, asi Jehovha anoyera zvinangwa.

³Kumikidza kuna Jehovha chose chaunoita, ipapo urongwa hwako huchabudirira.

⁴Jehovha anoitira zvinhu zvose magumo azvo; kunyange akaipa anomuitira zuva renjodzi.

⁵Jehovha anovenga vose vane mwoyo inozvikudza. Zvirokwazvo, havangaregi kurangwa.

⁶Kubudikidza norudo nokutendeka, chivi chinoyananisirwa, kubudikidza nokutya Jehovha munhu anorega kuita zvakaipa.

⁷Kana nzira dzomunhu dzichifadza Jehovha, anoita kuti kunyange vavengi vake vagarisane naye murugare.

⁸Zviri nani kuva nezvishoma mukururama, pane kuva nezvakawanda kwazvo mukusaruramisira.

⁹Mumwoyo make munhu anoronga gwara rake, asi Jehovha ndiye anotonga kufamba kwake.

¹⁰Miromo yamambo inotaura seinotaura chirevo chaMwari, uye muromo wake haufaniri kurega kururamisira.

¹¹Zviyero nezvienzaniso zvechokwadi zvinobva kuna Jehovha; zviyero zvose zviri muhomwe ndiye akazviita.

¹²Madzimambo anovenga kuita zvakaipa, nokuti chigaro choushe chinosimbiswa nokururama.

¹³Madzimambo anofarira miromo inotaura chokwadi; anoremekedza munhu anotaura chokwadi.

¹⁴Kutsamwa kwamambo inhume yorufu, asi munhu akachenjera anonyaradza kutsamwa uku.

¹⁵Kana chiso chamambo chichibwinya, zvinoreva upenyu, nyasha dzake dzakaita segore remvura panguva yomunakamwe.

¹⁶Zviri nani sei kuwana uchenjeri pane goridhe, kusarudza njere pane sirivha!

¹⁷Mugwagwa mukuru wavakarurama unonzvenga zvakaipa; uye anochengeta nzira yake anochengeta upenyu hwake.

¹⁸Kuzvikudza kunotangira kuparadzwa, mweya wamanyawi unotangira kuwa.

¹⁹Zviri nani kuva nomweya unozvininipisa pakati pavakadzvinyirirwa pane kugoverana zvakapambwa navanozvikudza.

²⁰Ani naani anoteerera kurayirwa achabudirira, uye akaropafadzwa uyo anovimba naJehovha.

²¹Vakachenjera pamwoyo vanonzi ndivo vanonzvera, uye mashoko akanaka anokurudzira kurayirwa.

²²Njere itsime roupenyu kuna avo vanadzo, asi upenzi hunouyisa kurangwa kumapenzi.

²³Mwoyo womunhu akachenjera unotungamirira muromo wake, uye miromo yake inokurudzira kurayirwa.

²⁴Mashoko anofadza akafanana nezinga rouchi, anozipa kumweya, anoporesa mapfupa.

²⁵Kune nzira inoita seyakanaka kumunhu, asi magumo ayo inoenda kurufu.

²⁶Nzara yomushandi inomushandira; nzara yake inoita kuti arambe achishanda.

²⁷Munhu asina maturo anoronga zvakaipa, uye matauriro ake akaita somoto unopisa.

²⁸Munhu akatsauka anomutsa kupesana, uye guhwa rinoparadzanisa shamwari dzepedyo.

²⁹Munhu anoita nechisimba anonyengera muvakidzani wake, uye anomufambisa napanzira isina kunaka.

³⁰Uyo anochonya nameso ake ari kuronga zvakaipa; uyo anoruma miromo yake ari kuda kuita zvakaipa.

³¹Bvudzi rakachena ikorona yakaisvonaka; inowanikwa noupenyu hwakarurama.

³²Zviri nani kuva munhu ane mwoyo murefu pane kuva murwi, munhu anozvibata pakutsamwa kwake ari nani pane uyo anotapa guta.

³³Mujenya unokandirwa pamakumbo, asi zvirevo zvose zvinobva kuna Jehovha.