Read Bhaibheri Dzvene MuChiShona Chanhasi Zvirevo 17 Bible Online

Zvirevo 17 - Bhaibheri Dzvene MuChiShona Chanhasi bible

Zvirevo 17

¹Zviri nani kuva nechimedu chakaoma chechingwa uine rugare norunyararo pane imba izere namabiko, ine kupesana.

²Muranda akachenjera achatonga mwanakomana anonyadzisa, uye achagoverwa nhaka somumwe wehama.

³Hari ndeyokunyautsira sirivha uye choto ndechokunatsa goridhe, asi Jehovha ndiye anoedza mwoyo.

⁴Munhu akaipa anoteerera miromo yakaipa; murevi wenhema anorerekera nzeve yake kururimi runoparadza.

⁵Uyo anoseka varombo anozvidza Musiki wavo, ani naani anofarira njodzi dzavamwe haangaregi kurangwa.

⁶Vana vevana ikorona kune vakwegura, uye vabereki ndivo kukudzwa kwavana vavo.

⁷Kutaura kuna manyawi hakuna kufanira benzi, zvikuru sei kutaura nhema kwomubati!

⁸Fufuro inofadza uyo anoipa; kwose kwose kwaanoenda, anobudirira.

⁹Uyo anofukidzira kudarika kwomumwe anotsvaka rudo, asi ani naani anomutsazve mhaka anoparadzanisa shamwari dzepedyo.

¹⁰Kutsiurwa kunofadza munhu ane njere kupfuura kurohwa kwebenzi kazana.

¹¹Munhu akaipa anongotsvaka kumukira chete; nhume isina tsitsi ichatumirwa kundomurwisa.

¹²Zviri nani kusangana nechikara chatorerwa vana vacho pane benzi muupenzi hwaro.

¹³Kana munhu akaripira zvakanaka nezvakaipa zvakaipa hazvizombobvi paimba yake.

¹⁴Kuvamba kwokukakavara kwakafanana nokudziurira mvura yedhamu; saka rega nharo kurwa kusati kwatanga.

¹⁵Kupembedza ane mhosva nokupomera asina mhaka, Jehovha anozvivenga zvose.

¹⁶Ine basa reiko mari kana iri muruoko rwebenzi, sezvo risina chishuvo chokuwana uchenjeri?

¹⁷Shamwari inoda panguva dzose, uye hama yakaberekerwa kupikisana.

¹⁸Munhu anoshayiwa njere ndiye anombunda noruoko rwake pamhiko, uye anoitira muvakidzani wake rubatso.

¹⁹Uyo anoda zvokukakavara anoda chivi; uyo anovaka suo refu anotsvaka kuparadzwa.

²⁰Munhu ane mwoyo wakaipa haabudiriri; uyo ane rurimi runonyengera achawira mudambudziko.

²¹Kuva nomwanakomana benzi kunouyisa kurwadziwa; baba vebenzi havana mufaro.

²²Mwoyo wakafara mushonga wakanaka, asi mweya wakaputsika unoomesa mapfupa.

²³Munhu akaipa anogamuchira fufuro muchivande, kuti aminamise nzira dzokururamisira.

²⁴Munhu ane njere anoisa uchenjeri pamberi, asi meso ebenzi anosvika kumagumo enyika.

²⁵Mwanakomana benzi anorwadzisa baba vake, uye anoitisa shungu uyo akamubereka.

²⁶Hazvina kunaka kuranga munhu asina mhosva, kana kurova machinda nokuda kwokururama kwavo.

²⁷Munhu ano ruzivo anoshandisa mashoko achizvidzora, uye munhu anonzwisisa akadzikama.

²⁸Kunyange benzi, kana rakanyarara, rinonzi rakachenjera, uye rikabata muromo waro rinonzi rakangwara.