Read Bhaibheri Dzvene MuChiShona Chanhasi Zvirevo 18 Bible Online

Zvirevo 18 - Bhaibheri Dzvene MuChiShona Chanhasi bible

Zvirevo 18

¹Munhu asina ukama navamwe anongozvitsvakira zvake; anozvidza kutonga kwakanaka kwose.

²Benzi harifariri kunzwisisa, asi rinofarira kungotaura zvarinofunga chete.

³Panosvika chakaipa, kuzvidzwa kunouyawo, uye kana nyadzi dzichisvika kusakudzwa kwasvikawo.

⁴Mashoko omuromo womunhu imvura yakadzika, asi tsime rouchenjeri chitubu chinoyerera.

⁵Hazvina kunaka kutsaura akaipa kana kusaruramisira asina mhosva.

⁶Miromo yebenzi inoriunzira kukakavara, uye muromo wake unomukokera kurohwa.

⁷Muromo webenzi ndiwo kuparadzwa kwaro, uye miromo yaro ndiwo musungo kumweya waro.

⁸Mashoko amakuhwa akaita semisuva yakanakisisa; anoenda pakadzikadzika mukati momunhu.

⁹Uyo ano usimbe pakubata kwake ihama youyo anoparadza.

¹⁰Zita raJehovha inhare yakasimba; vakarurama vanomhanyira kwariri vagochengetedzwa.

¹¹Pfuma yavapfumi ndiro guta ravo rina masvingo; vanoriona sorusvingo rurefu pakufunga kwavo.

¹²Kuparadzwa kusati kwasvika, mwoyo womunhu unozvikudza, asi kuzvininipisa kunotangira kukudzwa.

¹³Uyo anopindura asati anzwa, ndihwo upenzi hwake nokunyadziswa kwake.

¹⁴Mweya womunhu unomusimbisa panguva yokurwara, asi mweya wakapwanyika ndiani angautakura?

¹⁵Mwoyo woune njere unowana ruzivo, nzeve dzowakachenjera dzinorutsvaka.

¹⁶Chipo chinozarurira nzira kune achipa, uye chinomusvitsa pamberi pavakuru.

¹⁷Anotanga kusvitsa nyaya yake anoita seakanaka, kusvikira mumwe auya mberi kuzomubvunza.

¹⁸Kukanda mijenya kunopedza gakava, uye kunotonga pakati pavaviri vanopikisana zvikuru.

¹⁹Hama yatadzirwa yakavangarara kupfuura guta rakakomberedzwa namasvingo, uye kukakavara kwakafanana namazariro amasuo omuzinda wamambo.

²⁰Kubva pazvibereko zvomuromo wake dumbu romunhu rinogutiswa; nezvinobva pamiromo yake achagutiswa.

²¹Rurimi rune simba roupenyu norufu, uye vaya vanoruda vachadya chibereko charwo.

²²Uyo anowana mudzimai anowana chinhu chakanaka, uye anogamuchira nyasha kubva kuna Jehovha.

²³Murombo anokumbira kuitirwa tsitsi, asi mupfumi anopindura nehasha.

²⁴Munhu ane shamwari dzakawanda angangoparadzwa, asi kune shamwari inonamatira kupfuura hama.