Read Bhaibheri Dzvene MuChiShona Chanhasi Zvirevo 19 Bible Online

Zvirevo 19 - Bhaibheri Dzvene MuChiShona Chanhasi bible

Zvirevo 19

¹Zviri nani kuva murombo ane mafambiro akarurama, pane benzi rine muromo wakatsauka.

²Hazvibatsiri kushingaira usina zivo, kana kukurumidza uchizorasika nzira.

³Upenzi hwomunhu hunoparadza upenyu hwake, asi mwoyo wake unotsamwira Jehovha.

⁴Pfuma inouyisa shamwari zhinji, asi murombo anosiyiwa neshamwari dzake.

⁵Chapupu chenhema hachingaregi kurangwa, uye uyo anodurura manyepo haangaregedzwi.

⁶Vazhinji vanotsvaka nyasha kumutongi, uye mumwe nomumwe ishamwari yomunhu anopa zvipo.

⁷Murombo anoraswa nehama dzake dzose, kuzoti shamwari dzake, dzinomunzvenga zvakadii! Kunyange akavatevera achidemba kwazvo havangawanikwi.

⁸Uyo anowana uchenjeri anoda upenyu hwake; uye anochengeta kunzwisisa anobudirira.

⁹Chapupu chenhema hachingaregi kurangwa, uye uyo anodurura manyepo achaparara.

¹⁰Hazvina kufanira kuti benzi rigarike, ko, zvakanyanya kuipa sei kuti muranda atonge machinda!

¹¹Uchenjeri hwomunhu hunomupa mwoyo murefu; kukudzwa kwake ndiko kukanganwira kudarika kwomumwe.

¹²Kutsamwa kwamambo kwakafanana nokuomba kweshumba, asi nyasha dzake dzakaita sedova pauswa.

¹³Mwanakomana benzi ndiko kuparara kwababa vake, uye mukadzi anokakavara akafanana nemvura inoramba ichingodonha.

¹⁴Dzimba nepfuma inhaka inobva kuvabereki, asi mukadzi akanaka anobva kuna Jehovha.

¹⁵Usimbe hunouyisa hope dzakadzama, uye munhu asingashandi achafa nenzara.

¹⁶Uyo anoteerera kurayira anochengetedza upenyu hwake, asi uyo asina hanya nenzira dzake achafa.

¹⁷Uyo anonzwira varombo tsitsi anopa kuna Jehovha, uye achamupa mubayiro wezvaakaita.

¹⁸Ranga mwanakomana wako, nokuti mukuranga ndimo mune tariro; usava nechikamu pakuparadzwa kwake.

¹⁹Munhu ane hasha zvikuru anofanira kuripa mhosva yake; kana ukamununura, unofanira kuzomununurazve.

²⁰Teerera zano ugamuchire kurayirwa, uye pakupedzisira uchava wakachenjera.

²¹Mune urongwa huzhinji mumwoyo momunhu, asi kuda kwaJehovha ndiko kunobudirira.

²²Chinodiwa nomunhu rudo rusingagumi; zviri nani kuva murombo pano kuva murevi wenhema.

²³Kutya Jehovha kunotungamirira kuupenyu: Ipapo munhu achazorora zvakanaka, asingawirwi nedambudziko.

²⁴Simbe inoisa ruoko rwayo mundiro; igotadza kunyange kurwudzosa kumuromo wayo!

²⁵Rova museki, ipapo vasina mano vachadzidzawo ungwaru; tsiura munhu ane njere, ipapo achawana zivo.

²⁶Uyo anobira baba vake uye achidzinga mai vake mwanakomana anonyadzisa.

²⁷Mwanakomana wangu, ukasateerera kurayirwa, uchatsauka kubva pamashoko oruzivo.

²⁸Chapupu chakaipa chinoseka kururamisira, uye muromo womunhu akaipa unomedza zvakaipa.

²⁹Kurangwa kwakagadzirirwa vaseki, uye kurohwa misana yamapenzi.