Read Bhaibheri Dzvene MuChiShona Chanhasi Zvirevo 2 Bible Online

Zvirevo 2 - Bhaibheri Dzvene MuChiShona Chanhasi bible

Zvirevo 2

¹Mwanakomana wangu, kana ukagamuchira mashoko angu, ukachengeta mirayiro yangu mauri,

²ukarerekera nzeve yako kuuchenjeri uye ukaisa mwoyo wako pakunzwisisa,

³uye kana ukadanidzira kuti uwanze njere uye ukadanidzira nenzwi guru kuti uwane kunzwisisa,

⁴uye kana ukahutsvaka sounotsvaka sirivha nokuhutsvaka sounotsvaka pfuma yakavanzwa,

⁵ipapo uchanzwisisa kutya Jehovha uye uchawana ruzivo rwaMwari.

⁶Nokuti Jehovha anopa uchenjeri, uye mumuromo make munobuda zivo nokunzwisisa.

⁷Anochengetera vakarurama kukunda, iye ndiye nhoo kuna avo vane mufambiro usina chaunopomerwa,

⁸nokuti anochengetedza nzira yavakarurama, uye anodzivirira nzira yavakatendeka vake.

⁹Ipapo uchanzwisisa zvakarurama, kururamisira nokuenzanisira nzira dzose dzakanaka.

¹⁰Nokuti uchenjeri huchapinda mumwoyo mako, uye ruzivo ruchafadza mweya wako.

¹¹Kungwara kuchakuchengetedza, uye kunzwisisa kuchakurinda.

¹²Uchenjeri huchakuponesa panzira dzavanhu vakaipa, vanhu vane mashoko asakarurama,

¹³vanosiya nzira yakarurama kuti vafambe munzira dzerima,

¹⁴vanofarira kuita zvakaipa uye vanofarira kusarurama kwezvakaipa,

¹⁵vane nzira dzakaminama uye vanonyengera pamaitiro avo.

¹⁶Zvichakuponesazve pamukadzi chifeve, kubva pamudzimai asingazvibati, anokwezva namashoko ake,

¹⁷uyo akasiya murume woumhandara hwake uye akashaya hanya nesungano yaakaita pamberi paMwari.

¹⁸Nokuti imba yake inoenda kurufu, uye nzira dzake kumweya yavakafa.

¹⁹Hakuna anoenda kwaari achidzoka kana kuzowana nzira dzoupenyu.

²⁰Naizvozvo iwe uchafamba munzira dzavanhu vakanaka uye ucharamba uri munzira dzavakarurama.

²¹Nokuti vakarurama vachagara munyika, uye vasina chavanopomerwa vacharamba vari mairi;

²²asi vakaipa vachaparadzwa panyika, uye vasina kutendeka vachabviswa pairi.