Read Bhaibheri Dzvene MuChiShona Chanhasi Zvirevo 20 Bible Online

Zvirevo 20 - Bhaibheri Dzvene MuChiShona Chanhasi bible

Zvirevo 20

¹Waini museki uye doro mupopoti; ani naani anotsauswa nazvo haana kuchenjera.

²Kutsamwa kwamambo kwakafanana nokuomba kweshumba; uyo anomutsamwisa anotadzira upenyu hwake.

³Munhu achakudzwa kana akagara kure nokukakavara, asi benzi rimwe nerimwe rinokurumidza kupopota.

⁴Simbe hairimi mumwaka wokurima; saka panguva yokukohwa anotsvaka asi hapana chaanowana.

⁵Zvinangwa zvomwoyo womunhu imvura yakadzika, asi munhu akachenjera achaichera.

⁶Vanhu vazhinji vanoti vane rudo rusingagumi, asi munhu akatendeka angawanikwa kupiko?

⁷Munhu akarurama anorarama upenyu hwakanaka; vana vake vanomutevera vakaropafadzwa.

⁸Kana mambo achinge agara pachigaro chake kuti atonge, anopepeta zvakaipa zvose nameso ake.

⁹Ndiani angati, “Ndakachengeta mwoyo wangu wakachena; ndakachena uye handina zvivi”?

¹⁰Zviereso zvakasiyana nezvipimo zvakasiyana Jehovha anozvivenga zvose.

¹¹Kunyange mwana anozivikanwa nezvaanoita, kuti tsika dzake dzakanaka uye kuti dzakarurama here.

¹²Nzeve dzinonzwa nameso anoona, Jehovha ndiye akazviita zvose zviri zviviri.

¹³Usafarira kurara kana kuti uchava murombo; svinudza meso ako ipapo uchava nezvokudya zvakawanda.

¹⁴“Hazvina kunaka, hazvina kunaka!” ndizvo zvinotaura mutengi; ipapo hoyo oenda achizvirumbidza pamusoro pezvaatenga.

¹⁵Goridhe riripo, uye matombo anokosha amarubhi azere, asi miromo inotaura zivo ndicho chinhu chinokosha chisipo.

¹⁶Mutorerei nguo yake, uyo anoitira mutorwa rubatso; itorei sorubatso kana azviitira mukadzi asingazvibati.

¹⁷Zvokudya zvakawanikwa nokunyengera zvinonaka kumunhu, asi achapedzisira ava nomukanwa mazara jecha.

¹⁸Ita urongwa nokutsvaga mazano; kana uchironga hondo, tsvaka kutungamirirwa.

¹⁹Guhwa rinoputsa chivimbo; saka furatira munhu anotaurisa.

²⁰Kana munhu akatuka baba vake kana mai vake, mwenje wake uchadzimwa parima guru.

²¹Nhaka yakakurumidza kuwanikwa pakutanga haingaropafadzwi pamagumo ayo.

²²Usati, “Ndichatsiva zvawanditadzira izvi!” Mirira Jehovha, uye iye achakubatsira.

²³Jehovha anovenga zviereso zvinosiyana, uye zviero zvinonyengera hazvimufadzi.

²⁴Kufamba kwomunhu kunotungamirirwa naJehovha. Zvino munhu anganzwisisa sei nzira yake?

²⁵Musungo kumunhu kuti akumikidze chimwe chinhu nokukurumidza uye ozorangarira mhiko dzake pava paya.

²⁶Mambo akachenjera anopepeta zvakaipa; anofambisa vhiri rokupura pamusoro pavo.

²⁷Mwenje waJehovha unonzvera mweya womunhu; unonzvera zviri mukatikati make.

²⁸Rudo nokutendeka zvinochengetedza mambo; kubudikidza norudo chigaro chake chinosimbiswa.

²⁹Kukudzwa kwamajaya ndiro simba ravo, bvudzi jena kubwinya kwavakwegura.

³⁰Kurohwa nokukuvadzwa zvinobvisa zvakaipa, uye kurohwa neshamhu kunovaka munhu womukati.