Read Bhaibheri Dzvene MuChiShona Chanhasi Zvirevo 21 Bible Online

Zvirevo 21 - Bhaibheri Dzvene MuChiShona Chanhasi bible

Zvirevo 21

¹Mwoyo wamambo uri muruoko rwaJehovha; anouendesa kwaanoda sehova dzemvura.

²Nzira dzose dzomunhu dzinoita sedzakarurama kwaari, asi Jehovha anoyera mwoyo pachikero.

³Kuita zvakarurama nokururamisira zvinonyanya kufadza Jehovha kupfuura chibayiro.

⁴Meso ana manyawi nomwoyo unozvikudza, mwenje woakaipa, ndizvo chivi!

⁵Urongwa hwavanoshingaira hunouyisa zvizhinji, sezvo, zvirokwazvo, kukurumidzisa kuchiuyisa urombo.

⁶Pfuma yakaunganidzwa norurimi runoreva nhema imhute inopupurutswa uye muteyo wakaipisisa.

⁷Kumanikidza kwavakaipa kuchavazvuzvurudzira kure, nokuti vanoramba kuita zvakarurama.

⁸Nzira yeane mhosva yakaminama, asi kufamba kwaasina mhosva kwakarurama.

⁹Zviri nani kugara pakona yedenga remba, pano kugara mumba nomudzimai anokakavara.

¹⁰Munhu akaipa anoshuvira zvakaipa; muvakidzani wake haawani tsitsi kubva kwaari.

¹¹Kana museki akarangwa vasina mano vanowana uchenjeri; kana munhu akachenjera akarayirwa anowana zivo.

¹²Iye Akarurama anocherechedza imba yeakaipa, uye anoisa akaipa kukuparadzwa.

¹³Kana munhu akadzivira nzeve dzake kumurombo, naiyewo achachema uye hapana achamunzwa.

¹⁴Chipo chinopiwa muchivande chinonyaradza hasha, uye fufuro yakavigwa mujasi inonyaradza kutsamwa kukuru.

¹⁵Kana kururamisira kwaitwa, kunouyisa mufaro kuna vakarurama, asi kunovhundutsa vaiti vezvakaipa.

¹⁶Munhu anorasika panzira yokunzwisisa achandozororera muungano yavakafa.

¹⁷Uyo anofarira mafaro achava murombo; ani naani anofarira waini namafuta haazombopfumi.

¹⁸Akaipa achava dzikinuro yavakarurama, uye vasina kutendeka vachava dzikinuro yaakatendeka.

¹⁹Zviri nani kugara mugwenga, pano kugara nomudzimai anokakavara uye ane hasha.

²⁰Mumba mowakachenjera mune zvokudya zvakaisvonaka zvakawanda namafuta, asi benzi rinodya zvose zvarinazvo.

²¹Uyo anotevera kururama norudo anowana upenyu, nokubudirira norukudzo.

²²Munhu akachenjera anorwisa guta ravane simba agoputsa nhare dzaro dzavanovimba nadzo.

²³Uyo anorinda muromo wake norurimi rwake anozvidzivirira kubva panjodzi.

²⁴Munhu anozvikudza uye ana manyawi “Mudadi” ndiro zita rake; anoita zvinhu namanyawi uye nokuzvikudza.

²⁵Kushuva kwesimbe kunova rufu rwake, nokuti maoko ake anoramba kushanda.

²⁶Muswere wose wezuva anoramba achida zvimwe, asi akarurama anopa asinganyimi.

²⁷Chibayiro chowakaipa chinonyangadza, zvikuru sei kana akauya nacho nomufungo wakaipa!

²⁸Chapupu chenhema chichaparara, uye ani naani anoteerera kwaari achaparadzwa nokusingaperi.

²⁹Munhu akaipa ane chiso chisinganyari, asi munhu akarurama anofunga pamusoro penzira dzake.

³⁰Hapana uchenjeri kana njere kana urongwa hungabudirira huchipikisana naJehovha.

³¹Bhiza rinogadzirirwa zuva rokurwa, asi kukunda kunobva kuna Jehovha.