Read Bhaibheri Dzvene MuChiShona Chanhasi Zvirevo 22 Bible Online

Zvirevo 22 - Bhaibheri Dzvene MuChiShona Chanhasi bible

Zvirevo 22

¹Zita rakanaka rinodiwa kwazvo kupfuura pfuma zhinji; kuremekedzwa kuri nani pane sirivha kana goridhe.

²Vapfumi navarombo vakafanana pachinhu ichi: Jehovha ndiye Musiki wavo vose.

³Munhu akangwara anoona njodzi agohwanda, asi asina mano anoramba achienda uye agotambudzika nokuda kwaizvozvo.

⁴Kuzvininipisa nokutya Jehovha kunouyisa pfuma nokukudzwa uye noupenyu.

⁵Munzira yeakaipa mune minzwa nemisungo, asi uyo anochengeta mweya wake anogara kure nazvo.

⁶Rovedza mwana munzira yaanofanira kufamba nayo, uye kana achinge akura haazotsauki kubva pairi.

⁷Mupfumi anobata ushe pamusoro pomurombo, uye anokwereta anova muranda weanokweretesa.

⁸Uyo anodyara kuipa anokohwa dambudziko, uye tsvimbo yokutsamwa kwake ichaparadzwa.

⁹Munhu anopa zvakawanda acharopafadzwa, nokuti anopa varombo zvokudya zvake.

¹⁰Dzinga museki, kukakavara kunobva kwaendawo; kupopotedzana nokutukana kunoguma.

¹¹Uyo anoda mwoyo wakachena uye anotaura zvakanaka, achava shamwari yamambo.

¹²Meso aJehovha anorinda zivo, asi anokonesa mashoko omunhu asina kutendeka.

¹³Simbe inoti, “Panze pane shumba,” kana kuti, “Ndinourayiwa munzira!”

¹⁴Muromo womukadzi chifeve igomba rakadzika; uyo ari pasi pokutsamwa kwaJehovha achawira mariri.

¹⁵Upenzi hwakasungirirwa mumwoyo momwana, asi shamhu yokuranga ichahudzingira kure naye.

¹⁶Uyo anomanikidza varombo kuti awedzere pfuma yake nouyo anopa zvipo kuvapfumi, vose vachava varombo.

¹⁷Nyatsoteerera unzwe mashoko omuchenjeri; isa mwoyo wako kumashoko andinokudzidzisa,

¹⁸nokuti chinhu chinofadza kana ukaachengeta mumwoyo mako, uye ugare wakagadzirira kuataura ose.

¹⁹Kuti uvimbe naJehovha, ndinokudzidzisa nhasi, kunyange iyewe.

²⁰Handina kukunyorera zvirevo makumi matatu here, mashoko edzidziso noruzivo,

²¹kukudzidzisa mashoko echokwadi anovimbika, kuitira kuti ugopa mhinduro dzakafanira kuno uyo akakutuma?

²²Usatorera varombo nokuti varombo, uye usamanikidza vanoshayiwa mudare redzimhosva,

²³nokuti Jehovha achavarwira pamhaka yavo, uye achapamba vanovapamba.

²⁴Usaita ushamwari nomunhu ane hasha, uye usafambidzana nomunhu anokurumidza kutsamwa,

²⁵kuti urege kudzidza tsika dzake, uye urege kuzviteya nomusungo.

²⁶Usava munhu anombunda ruoko pamhiko, kana kuzviita rubatso pazvikwereti;

²⁷kana usina chaungaripa nacho, uchatorerwa mubhedha wako chaiwo, paurere chaipo.

²⁸Usabvisa dombo romuganhu wakare, wakaiswapo namadzibaba ako.

²⁹Unoona munhu ane unyanzvi pabasa rake here? Achashanda pamberi pamadzimambo; haangashandiri vanhu vasina maturo.