Read Bhaibheri Dzvene MuChiShona Chanhasi Zvirevo 23 Bible Online

Zvirevo 23 - Bhaibheri Dzvene MuChiShona Chanhasi bible

Zvirevo 23

¹Kana ukagara pakudya pamwe chete nomubati, nyatsocherechedza zviri pamberi pako,

²uise banga pahuro kana uri munhu wamadyo.

³Usapanga zvokudya zvake zvinonaka nokuti zvokudya izvozvo zvinonyengera.

⁴Usazvionza nokuda kuwana pfuma; iva nouchenjeri hunoita kuti uzvibate.

⁵Kungoti tarisei papfuma, wanei yaenda, nokuti zvirokwazvo inomera mapapiro igobhururuka ichienda kudenga segondo.

⁶Usadya zvokudya zvomunhu anonyima, kana kupanga zvokudya zvake zvinonaka;

⁷nokuti munhu uya anongofunga chete mutengo wazvo. Anoti kwauri, “Idya ugonwa,” asi mumwoyo make asingadi.

⁸Ucharutsa zvishoma izvozvo zvawadya, uye unenge watambisa mashoko ako nokumutenda.

⁹Usataura nebenzi, nokuti richashora uchenjeri hwamashoko ako.

¹⁰Usabvisa dombo romuganhu wakare kana kupinda paminda yenherera,

¹¹nokuti Mudziviriri wavo ane simba; iye achavarwira pamhaka yavo newe.

¹²Isa mwoyo wako kumurayiro nenzeve dzako kumashoko ezivo.

¹³Usarega kuranga mwana; ukamuranga neshamhu, haafi.

¹⁴Murange neshamhu ugoponesa mweya wake kubva parufu.

¹⁵Mwanakomana wangu, kana mwoyo wako wakachenjera, ipapo mwoyo wangu uchafara;

¹⁶mukatikati mangu muchapembera kana miromo yako ichitaura zvakarurama.

¹⁷Usarega mwoyo wako uchichiva vatadzi, asi nguva dzose shingairira kutya Jehovha.

¹⁸Zvirokwazvo ramangwana rako rine tariro, uye tariro yako haingaparadzwi.

¹⁹Teerera, mwanakomana wangu, ugova nouchenjeri, uye uchengete mwoyo wako panzira yakarurama.

²⁰Usabatana navaya vanonwa waini zhinji, kunyange vaya vanokara nyama,

²¹nokuti zvidhakwa nevane madyo vachava varombo, uye hope dzichavapfekedza mamvemve.

²²Teerera kuna baba vako, ivo vakakubereka, uye usazvidza mai vako kana vachinge vakwegura.

²³Tenga zvokwadi urege kuzoitengesa; uwane uchenjeri, kuzvibata nokunzwisisa.

²⁴Baba vomunhu akarurama vane mufaro mukuru; uyo ane mwanakomana akachenjera anofadzwa naye.

²⁵Baba vako namai vako ngavafare; mai vakakubereka ngavafare kwazvo!

²⁶Mwanakomana wangu, ndipe mwoyo wako uye meso ako ngaananʼanidze nzira dzangu,

²⁷nokuti chifeve igomba rakadzika, uye mukadzi asingazvibati itsime rakamanikana.

²⁸Segororo anohwandira, anowedzera vasina kutendeka pakati pavarume.

²⁹Ndiani ane nhamo? Ndiani akasuwa? Ndiani anokakavara? Ndiani anonyunyuta? Ndiani ane mavanga pasina mhaka? Ndiani ane meso akatsvuka?

³⁰Vaya vanogara pawaini, vanoenda kundoravira makate ewaini yakavhenganiswa.

³¹Usatarisa waini kana yatsvuka, kana ichivaima iri mumukombe, kana ichidzika zvakanaka pakunwa!

³²Pakupedzisira inoruma senyoka uye ine uturu semvumbi.

³³Meso ako achaona zvisakamboonekwa uye pfungwa dzako dzichafunga zvakapesana.

³⁴Uchava souya akarara pamusoro pamafungu amakungwa, kana somunhu avete pamusoro pedanda rechikepe.

³⁵Uchati, “Vakandirova, asi handina kukuvara! Vakandirova asi handina kuzvinzwa! Ndichamuka rinhiko kuti ndigotsvakazve waini?”