Read Bhaibheri Dzvene MuChiShona Chanhasi Zvirevo 24 Bible Online

Zvirevo 24 - Bhaibheri Dzvene MuChiShona Chanhasi bible

Zvirevo 24

¹Usachiva vanhu vakaipa, usashuva kufamba navo;

²nokuti mwoyo yavo inoronga kuita nechisimba, uye miromo yavo inotaura pamusoro pokuita mhirizhonga.

³Nouchenjeri imba inovakwa, uye kubudikidza nokunzwisisa inosimbiswa;

⁴kubudikidza nezivo makamuri ayo anozadzwa nezvinhu zvinoshamisa uye nepfuma yakaisvonaka inokosha.

⁵Munhu akachenjera ane simba guru, uye munhu ane zivo anowedzera simba;

⁶nokuti kundorwa hondo kunoda kutungamirirwa, uye kuti ukunde unoda vapi vamazano vazhinji.

⁷Uchenjeri hahusvikirwi nebenzi; padare repasuo reguta harina chokutaura.

⁸Uyo anoronga kuita zvakaipa achazivikanwa senhubu.

⁹Mufungo woupenzi chivi, uye vanhu vanonyangadzwa nomuseki.

¹⁰Kana ukapera simba panguva dzokutambudzika, simba rako ishoma sei!

¹¹Nunurai avo vari kuiswa kurufu; dzosai avo vari kudzedzereka vachienda kundourayiwa.

¹²Asi kana mukati, “Hapana zvataiziva pamusoro paizvozvi?” Ko, iye anoyera mwoyo haangazvioni here? Iye anorinda upenyu hwako haangazvizivi here? Haangaripire munhu mumwe nomumwe maererano nezvaakaita here?

¹³Idya uchi, mwanakomana wangu, nokuti hwakanaka; uchi hunobva pazinga hunozipa parurimi.

¹⁴Uzivewo zvakare kuti uchenjeri hunozipa kumweya wako; kana wahuwana, ramangwana rako rine tariro, uye tariro yako haingaparari.

¹⁵Usavandira sezvinoita akaipa paimba yomunhu akarurama, usaparadza paanogara;

¹⁶nokuti kunyange munhu akarurama achiwa runomwe, anosimukazve, asi akaipa anowisirwa pasi nenjodzi.

¹⁷Usafara kana muvengi wako achiwa; paanogumburwa, mwoyo wako ngaurege kufara,

¹⁸kana kuti Jehovha achazviona akasafara nazvo uye agobvisa kutsamwa kwake kwaari.

¹⁹Usashungurudzika nokuda kwavanhu vakaipa, kana kuchiva vakaipa,

²⁰nokuti vanhu vakaipa havana tariro yeramagwana, uye mwenje wavakaipa uchadzimwa.

²¹Itya Jehovha namambo, mwanakomana wangu, usabatana navanopanduka,

²²nokuti vaviri ivavo vanouyisa kuparadzwa kwavari nokukurumidza, uye ndiani anoziva njodzi dzavangauyisa?

²³Izviwo zvirevo zvomuchenjeri: Kuita rusaruro mukutonga hakuna kunaka:

²⁴Ani naani anoti kune ane mhosva, “Hauna mhosva,” marudzi achamutuka uye ndudzi dzichamushora.

²⁵Asi zvichanakira vaya vanopa mhosva kune vane mhosva, uye kuropafadzwa kukuru kuchauya pamusoro pavo.

²⁶Mhinduro yechokwadi yakafanana nokutsvoda pamiromo.

²⁷Pedza basa rako rapanze ugadzirire minda yako; shure kwaizvozvo, uvake imba yako.

²⁸Usava chapupu chinopomera muvakidzani wako pasina mhaka, kana kushandisa miromo yako kuti unyengere.

²⁹Usati, “Ndichamuitirawo zvaakandiitira; ndicharipira munhu uya zvaakaita.”

³⁰Ndakapfuura napamunda wesimbe, ndikapfuura napamunda womuzambiringa womunhu asina njere;

³¹minzwa yakanga yamera pose pose, munda wakanga wafukidzwa nesora, uye rusvingo rwamabwe rwakanga rwakoromoka.

³²Ndakafungisisa zvandakanga ndacherechedza ndikadzidza chidzidzo pane zvandakanga ndaona.

³³Kumbovata zvishomanana, kumbotsumwaira, kumbofungatira maoko kuti ndizorore,

³⁴ipapo urombo huchauya pauri segororo uye kushayiwa kuchauya somunhu akashonga nhumbi dzokurwa nadzo.