Read Bhaibheri Dzvene MuChiShona Chanhasi Zvirevo 26 Bible Online

Zvirevo 26 - Bhaibheri Dzvene MuChiShona Chanhasi bible

Zvirevo 26

¹Sechando muzhizha kana mvura pakukohwa, rukudzo haruna kufanira kubenzi.

²Sezvinoita kadhimba pakubhururuka kwako, kana nyenganyenga pakubhururuka kwayo somuseve, saizvozvowo kutuka pasina mhosva hakuna zvakunoita.

³Tyava yakaitirwa bhiza, matomu akaitirwa mbongoro, uye shamhu musana webenzi!

⁴Usapindura benzi maererano noupenzi hwaro, kana kuti iwe pachako uchafanana naro.

⁵Pindura benzi maererano noupenzi hwaro, kuti rirege kuona sokuti rakachenjera.

⁶Sokuzvigura tsoka kana kunwa bongozozo, ndizvo zvakaita kutumira shoko noruoko rwebenzi.

⁷Samakumbo echirema akangorembera ndizvo zvakaita chirevo mumuromo webenzi.

⁸Sokusungira ibwe pachipfuramabwe ndizvo zvakaita kupa rukudzo kubenzi.

⁹Segwenzi reminzwa riri muruoko rwechidhakwa, ndizvo zvakaita chirevo chiri mumuromo webenzi.

¹⁰Somuwemburi weuta anopfura pose pose, ndizvo zvakaita anoshandirwa nebenzi kana nomupfuuri zvake.

¹¹Sembwa inodzokera kumarutsi ayo, ndizvo zvakaita benzi rinodzokorora upenzi hwaro.

¹²Unoona munhu anozviti akachenjera pakuona kwake here? Benzi rinotova netariro kupfuura iye.

¹³Simbe inoti, “Kune shumba kunzira, shumba inotyisa iri kufamba-famba munzira dzomumusha!”

¹⁴Segonhi rinotenderera pamahinji aro, ndizvo zvinoita simbe pamubhedha wayo.

¹⁵Simbe inoisa ruoko rwayo mundiro; inoita usimbe hwokutadza kurudzosera kumuromo wayo.

¹⁶Simbe inozviti yakachenjera pakuona kwayo kupfuura vanhu vanomwe vanopindura nenjere.

¹⁷Somunhu anobata imbwa nenzeve dzayo, ndizvo zvakaita mupfuuri anopindira pagakava risinei naye.

¹⁸Somupengo unopotsera zvitsiga zvomoto, kana miseve inouraya,

¹⁹ndizvo zvakaita munhu anonyengera muvakidzani wake uye achizoti, “Ndanga ndichiita zvangu je-e!”

²⁰Pasina huni moto unodzima; pasina makuhwa kukakavara kunopera.

²¹Sezvakaita mazimbe pazvitsiga zvinopfuta nehuni pamoto, ndizvo zvakaita munhu wegakava pakupfutidza rukave.

²²Mashoko eguhwa akaita semisuva yakaisvonaka inodzika mukatikati momunhu.

²³Sezvinopenya zvakanamirwa kunze kwomudziyo wevhu, ndizvo zvakaita miromo inotaura zvinoyevedza, asi nomwoyo wakaipa.

²⁴Muparadzi anozvivanza namatauriro ake, asi mumwoyo make akaviga ruvengo.

²⁵Kunyange mashoko ake achitapira, usatenda zvaanotaura, nokuti mumwoyo make mune zvinonyangadza zvinomwe.

²⁶Ruvengo rwake rungavigwa mukunyengera kwake, asi kuipa kwake kuchabudiswa pachena paungano.

²⁷Kana munhu akachera gomba, achawira mariri; kana munhu akakungurutsa ibwe, richakunguruka, richidzokera pamusoro pake.

²⁸Rurimi runoreva nhema runovenga varunorwadzisa, uye muromo unobata kumeso unoparadza.