Read Bhaibheri Dzvene MuChiShona Chanhasi Zvirevo 27 Bible Online

Zvirevo 27 - Bhaibheri Dzvene MuChiShona Chanhasi bible

Zvirevo 27

¹Usazvirumbidza pamusoro pezuva ramangwana, nokuti hauzivi zvingauyiswa nezuva.

²Rega mumwe akurumbidze, kwete muromo wako; mumwe munhuwo zvake, kwete miromo yako iwe.

³Ibwe rinorema uye jecha mutoro, asi kudenhwa nebenzi kunorema kupfuura zvose.

⁴Hasha dzine utsinye uye kutsamwa kunokurira, asi ndiani angamira pamberi pomunhu ane godo?

⁵Kutsiurwa pachena kuri nani pane rudo rwakavanzika.

⁶Maronda okukuvadzwa neshamwari anogamuchirika, asi kutsvoda kwomuvengi kunonyengera.

⁷Uyo akaguta anovenga uchi, asi kune ane nzara kunyange zvinovava zvinozipa.

⁸Seshiri inorasika kubva padendere rayo, ndizvo zvakaita munhu anorasika kubva pamusha wake.

⁹Mafuta nezvinonhuhwira zvinouyisa mufaro kumwoyo, uye kunaka kwoushamwari kunobva padzidziso dzake dzakanaka.

¹⁰Usarasa shamwari yako kana shamwari yababa vako, uye usangoenda kumba yehama yako kana wawirwa nedambudziko chete, muvakidzani ari pedyo ari nani kupfuura hama iri kure.

¹¹Iva wakachenjera, mwanakomana wangu, ugofadza mwoyo wangu; ipapo ndichagona kupindura ani naani anondishora.

¹²Munhu akangwara anoona njodzi agovanda, asi asina mano anoramba achienda uye agokuvadzwa nayo.

¹³Torera nguo uyo anozviita rubatso kumutorwa; uitore semhiko kana achinge aiita rubatso kumukadzi asingazvibati.

¹⁴Kana munhu akafumira rungwanangwana kukwazisa muvakidzani wake achidaidzirisa zvichaonekwa sechituko.

¹⁵Mudzimai anokakavara akafanana nemvura inoramba ichidonha-donha mushure mokunge kwanaya;

¹⁶kumudzivisa zvakafanana nokudzivisa mhepo, kana kuchingidzira mafuta noruoko.

¹⁷Simbi inorodza simbi, saizvozvowo mumwe munhu anorodza mumwe.

¹⁸Uyo anochengeta muonde achadya zvibereko zvawo, uye uyo anochengeta tenzi wake achakudzwa.

¹⁹Sezvo mvura ichiratidza chiso, saizvozvowo mwoyo womunhu unoratidza munhu.

²⁰Rufu nokuparadza hazvimboguti, kunyangewo maziso omunhu haaguti.

²¹Hari ndeyokunyautsira sirivha uye choto ndechokunatsa goridhe, asi munhu anoedzwa nerumbidzo yaanowana.

²²Kunyange ukatswa benzi muduri, kumutswa sezviyo nomutswi, haungabvisi upenzi hwake maari.

²³Iva nechokwadi kuti unoziva mamiriro amakwai ako, uchengete zvakanaka mapoka ako;

²⁴nokuti pfuma haigari nokusingaperi, uye korona haigari kusvikira kuzvizvarwa zvose.

²⁵Kana uswa hukabviswa, uye bumhudza rikabuda, nesora rikaunganidzwa kubva kuzvikomo,

²⁶makwayana achakuwanisa zvokupfeka, uye mbudzi nomutengo womunda.

²⁷Uchava nomukaka wembudzi wakawanda wokudya iwe nemhuri yako, uye wokuraramisa varandakadzi vako.