Read Bhaibheri Dzvene MuChiShona Chanhasi Zvirevo 29 Bible Online

Zvirevo 29 - Bhaibheri Dzvene MuChiShona Chanhasi bible

Zvirevo 29

¹Munhu anoramba akaomesa mutsipa wake mushure mokutsiurwa kazhinji achaparadzwa nokukurumidza, kusina chingamubatsira.

²Kana vakarurama vachiwanda, vanhu vanofara; asi kana vakaipa vachitonga, vanhu vanogomera.

³Munhu anoda uchenjeri anouyisa mufaro kuna baba vake, asi anoshamwaridzana nechifeve anoparadza pfuma yake.

⁴Nokururamisira mambo anosimbisa nyika, asi uyo anokara fufuro anoiparadza.

⁵Ani naani anonyengera muvakidzani wake anodzikira tsoka dzake mumbure.

⁶Munhu akaipa anoteyiwa nezvivi zvake, asi munhu akarurama anogona kuimba uye agofara.

⁷Vakarurama vane hanya nokururamisirwa kwavarombo, asi vakaipa havana hanya naizvozvo.

⁸Vatuki vanomutsa bope muguta, asi vanhu vakachenjera vanodzora kutsamwa.

⁹Kana munhu akachenjera akaenda kumatare nebenzi, benzi rinotsamwa uye rigotuka, zvokuti hapangavi norugare.

¹⁰Vanhu vanofarira kudeura ropa vanovenga munhu akarurama, uye vanotsvaka kuuraya vakarurama.

¹¹Benzi rinobudisa hasha dzaro dzose, asi munhu akachenjera anozvibata.

¹²Kana mutongi akateerera nhema machinda ake ose achava akaipa.

¹³Murombo nomunhu anomanikidza vakafanana pachinhu ichi: Jehovha ndiye anoita kuti meso avo vose aone.

¹⁴Kana mambo akatonga varombo nokururamisira, chigaro chake choushe chinogara chakachengetedzeka nguva dzose.

¹⁵Shamhu yokuranga inopa uchenjeri, asi mwana anosiyiwa akadaro achanyadzisa mai vake.

¹⁶Kana vakaipa vachiwanda, nezvivi zvinowandawo, asi vakarurama vachaona kuwa kwavo.

¹⁷Ranga mwanakomana wako, ipapo achakupa rugare; achauyisa mufaro kumweya wako.

¹⁸Pasina chizaruro, vanhu vanoramba kuzvidzora; asi akaropafadzwa uyo anochengeta murayiro.

¹⁹Muranda haarayirwi namashoko zvawo chete, nokuti kunyange achinzwisisa, haangadaviri.

²⁰Unoona here munhu anotaura achikurumidza? Benzi rine tariro zhinji kupfuura iye.

²¹Kana munhu akaregerera muranda wake kubva paudiki, achazotarisira kodzero dzomwanakomana pakupedzisira.

²²Munhu akashatirwa anomutsa kupesana, uye munhu ane hasha anoita zvivi zvizhinji.

²³Kuzvikudza kwomunhu kunomudzikisira pasi, asi munhu ane mweya wokuzvininipisa achawana kukudzwa.

²⁴Anoshamwaridzana nembavha anozvivenga iye pachake; anoiswa pasi pemhiko, asi haangakwanisi kupa uchapupu.

²⁵Kutya munhu kuchava musungo, asi ani naani anovimba naJehovha achagara akachengetedzeka.

²⁶Vazhinji vanotsvaka nyasha kumutongi, asi kururamisirwa kwomunhu kunobva kuna Jehovha.

²⁷Vakarurama vanovenga vasina kutendeka; vakaipa vanovenga vakarurama.