Read Bhaibheri Dzvene MuChiShona Chanhasi Zvirevo 3 Bible Online

Zvirevo 3 - Bhaibheri Dzvene MuChiShona Chanhasi bible

Zvirevo 3

¹Mwanakomana wangu, usakanganwa kudzidzisa kwangu, asi uchengete mirayiro yangu mumwoyo mako,

²nokuti zvichawedzera makore mazhinji kuupenyu hwako, uye nokubudirira.

³Rudo nokutendeka ngazvirege kukusiya; uzvisungirire pamutsipa wako, zvinyore pahwendefa romwoyo wako.

⁴Ipapo uchawana nyasha nezita rakanaka pamberi paMwari navanhu.

⁵Vimba naJehovha nomwoyo wako wose urege kuzendamira panjere dzako;

⁶munzira dzako dzose umutungamidze, uye acharuramisa nzira dzako.

⁷Usazviita munhu akachenjera pamaonero ako; itya Jehovha uvenge zvakaipa.

⁸Izvi zvichava utano pamuviri wako uye nokusimbiswa kwamapfupa ako.

⁹Kudza Jehovha nepfuma yako, zvokutanga zvezvirimwa zvako;

¹⁰ipapo matura ako achazadzwa kusvikira pakufashukira, uye makate ako achazara kusvika pamusoro newaini itsva.

¹¹Mwanakomana wangu, usazvidza kuranga kwaJehovha, uye usatsamwira kutsiura kwake,

¹²nokuti Jehovha anoranga avo vaanoda, sababa nomwanakomana wavanofarira.

¹³Akaropafadzwa munhu anowana uchenjeri, munhu anowana kunzwisisa,

¹⁴nokuti hwakanyanya kunaka kupfuura sirivha, uye hunopfumisa kupfuura goridhe.

¹⁵Hunokosha kupfuura marubhi; zvose zvaunoshuva hazvingafananidzwi nahwo.

¹⁶Mazuva mazhinji oupenyu ari muruoko rwahwo rworudyi; muruboshwe rwahwo mune upfumi nokukudzwa.

¹⁷Nzira dzahwo dzinofadza, uye makwara ahwo ose rugare.

¹⁸Ndihwo muti woupenyu kuna vose vanohumbundikira; vose vanohubata vacharopafadzwa.

¹⁹Nouchenjeri Jehovha akateya nheyo dzenyika, nokunzwisisa akaisa matenga munzvimbo dzawo;

²⁰noruzivo rwake mvura dzakadzika dzakapatsanurwa, uye makore akadonhedza dova.

²¹Mwanakomana wangu, chengetedza kutonga kwakanaka nokungwara, usazvirega zvichibva pameso ako;

²²zvichava upenyu kwauri, chishongo chakanaka pamutsipa wako.

²³Ipapo uchafamba panzira yako murugare, uye rutsoka rwako harungagumburwi;

²⁴paunovata pasi, haungatyi; paunovata pasi, hope dzako dzichava dzakanaka.

²⁵Usatya zvako dambudziko rinovhundutsa kana kuparadza kunokunda vakaipa,

²⁶nokuti Jehovha achava chivimbo chako uye achachengeta rutsoka rwako kuti rurege kubatwa.

²⁷Usarega kuitira zvakanaka kuno uyo akafanirwa nazvo, kana zviri musimba rako kuzviita.

²⁸Usati kumuvakidzani wako, “Ugodzoka imwe nguva; ndichazokupa mangwana,” iwe uchitova nazvo pauri.

²⁹Usaronga kuitira muvakidzani wako zvakaipa, anogara nechivimbo pedyo newe.

³⁰Usapomera munhu mhosva pasina chikonzero, iye asina zvaakutadzira.

³¹Usachiva munhu anoita zvinhu nechisimba, kana kusarudza ipi zvayo yenzira dzake,

³²nokuti Jehovha anovenga munhu akatsauka, asi anoudza akarurama zvaanoda kuita.

³³Kutuka kwaJehovha kuri paimba yeakaipa, asi anoropafadza musha womunhu akarurama.

³⁴Anoseka vaseki vanozvikudza, asi anoitira nyasha vanozvininipisa.

³⁵Vakachenjera vanowana kukudzwa, asi mapenzi anozviwanira kunyadziswa.