Read Bhaibheri Dzvene MuChiShona Chanhasi Zvirevo 30 Bible Online

Zvirevo 30 - Bhaibheri Dzvene MuChiShona Chanhasi bible

Zvirevo 30

¹Zvirevo zvaAguri mwanakomana waJake, shoko rake: Murume uyu akati kuna Itieri, kuna Itieri nokuna Ukari:

²“Ndini munhu asingazivi zvikuru kwazvo pakati pavanhu; handina kunzwisisa kwomunhu.

³Handina kudzidza uchenjeri, uye handina ruzivo rwaiye Mutsvene.

⁴Ndiani akakwidza kudenga uye akazoburuka? Ndiani akabata mhepo mumaoko ake? Ndiani akasungirira mvura munguo yake? Ndiani akaisa migumo yose yenyika? Zita rake ndiani, uye nezita romwanakomana wake? Ndiudzei kana muchiriziva!

⁵“Shoko rimwe nerimwe raMwari nderechokwadi; iye chidzitiro kuna avo vanovanda maari.

⁶Usawedzera kumashoko ake, kana kuti achakutsiura uye agokuratidza kuti uri murevi wenhema.

⁷“Zvinhu zviviri zvandinokumbira kwamuri, imi Jehovha, musandirambira izvi ndisati ndafa:

⁸Bvisai kusatendeka nenhema zvive kure neni; musandipa urombo kana pfuma, asi ndipei chete zvokudya zvemisi yose.

⁹Zvichida, ndingava nezvakawanda kwazvo ndikasakukudzai, uye ndikazoti, ‘Jehovha ndianiko?’ Kana kuti zvimwe ndingava murombo ndikaba, uye ndikasaremekedza zita raMwari wangu.

¹⁰“Usareva muranda kuna tenzi wake, nokuti achakutuka, uye uchazviripira izvozvo.

¹¹“Kuna avo vanotuka madzibaba avo uye vasingaropafadzi vanamai vavo;

¹²vaya vanozviti vakachena pamaonero avo asi vasina kusukwa tsvina yavo;

¹³vaya vane meso anozvikudza nguva dzose, vane matarisiro okushora;

¹⁴vaya vane meno anenge minondo nameno eshaya dzavo anenge mapanga kuti vaparadze varombo panyika, navanoshayiwa kubva pakati pavanhu.

¹⁵“Chikwevaropa chine vanasikana vaviri. Vanodanidzira vachiti, ‘Tipei! Tipei!’ “Kune zvinhu zvitatu zvisingatongoguti, zvina zvisingamboti, ‘Zvaringana!’:

¹⁶guva, chizvaro chisingabereki, pasi pasingaguti mvura, nomoto usingamboti, ‘Zvaringana!’

¹⁷“Ziso rinotuka baba, rinoshora kuteerera mai, richanongorwa namakunguo omumupata, richadyiwa namagora.

¹⁸“Pane zvinhu zvitatu zvinondishamisa kwazvo, zvina zvandisinganzwisisi, zvinoti:

¹⁹nzira yegondo riri mudenga, nenzira yenyoka paruware, nenzira yechikepe pagungwa, uye nzira yomurume ane musikana.

²⁰“Iyi ndiyo nzira yomukadzi chifeve: Anodya agopukuta muromo wake uye agoti, ‘Hapana chinhu chakaipa chandaita ini.’

²¹“Nyika inodedera nokuda kwezvinhu zvitatu, zvinhu zvina zvaisingadi kuona:

²²muranda anozova mambo, benzi rine zvokudya zvizhinji,

²³mukadzi akaroorwa asi asingadiwi, nomurandakadzi anotorera vatenzi vake murume.

²⁴“Panyika pane zvinhu zvina zvidiki, asi zvakachenjera kwazvo:

²⁵Masvosve zvipuka zvine simba duku asi anounganidza zvokudya zvawo muzhizha:

²⁶mbira zvipuka zvisina simba guru, asi dzinoita imba yadzo mumatombo;

²⁷mhashu hadzina mambo, asi dzinofamba pamwe chete mumapoka adzo;

²⁸dzvinyu rinogona kubatwa namaoko, asi rinowanikwa mumizinda yamadzimambo.

²⁹“Kune zvinhu zvitatu zvino kufamba kunokudzwa kwazvo, zvina zvino kufamba kunokudzwa kwazvo;

³⁰shumba, ine simba pakati pezvikara, isingadududzi pamberi pechikara chipi zvacho;

³¹mafambiro okuzvikudza ejongwe, nenhongo yembudzi, uye namambo akakomberedzwa navarwi vake.

³²“Kana uchinge waita upenzi nokuzvirumbidza pachako, kana kuti waronga zvakaipa, bata muromo wako noruoko rwako!

³³Nokuti somukaka warozva unobudisa ruomba, uye sokudzvinyirira mhino kunobudisa ropa, nokudaro kumutsa hasha kunobudisa kukakavara.”