Read Bhaibheri Dzvene MuChiShona Chanhasi Zvirevo 31 Bible Online

Zvirevo 31 - Bhaibheri Dzvene MuChiShona Chanhasi bible

Zvirevo 31

¹Zvirevo zvaMambo Remueri, zvirevo zvaakadzidziswa namai vake:

²“Nhaiwe mwanakomana wangu, iwe mwanakomana wokubereka, iwe mwanakomana wemhiko dzangu,

³usapedzera simba rako pavakadzi, nenzira dzako pane avo vanoparadza madzimambo.

⁴“Hazvisi zvamadzimambo, nhaiwe Remueri, hazvina kufanira madzimambo kunwa waini, hazvina kufanira vatongi kukara doro,

⁵nokuti vangazonwa vakakanganwa zvakatemwa nomurayiro, uye vakazotadza kururamisira kodzero dzavanomanikidzwa vose.

⁶Ipai doro kuna avo vari kuparara, newaini kuna avo vari mukurwadziwa:

⁷regai vanwe vakanganwe urombo hwavo, uye varege kuzorangarirazve kutambudzika kwavo.

⁸“Taurai pachinzvimbo chaavo vasingagoni kuzvitaurira, pamusoro pekodzero dzavose vanoshayiwa.

⁹Taura utonge zvakanaka; udzivirire kodzero dzavarombo navanoshayiwa.”

¹⁰Mudzimai ane unhu hwakanaka ndiani angamuwana? Mutengo wake unopfuura nokure matombo anokosha emarubhi.

¹¹Murume wake anovimba naye zvizere, uye haana chaanoshayiwa chinokosha.

¹²Anoitira murume wake zvakanaka, kwete zvakaipa, mazuva ose oupenyu hwake.

¹³Anosarudza wuru neshinda uye anoshanda namaoko anoshingaira.

¹⁴Akafanana nezvikepe zvavatengesi, anondotora zvokudya zvake kure.

¹⁵Anomuka kuchakasviba; agotsvagira mhuri yake zvokudya uye agopa varandakadzi vake basa ravo.

¹⁶Anonanʼanidza munda agoutenga; anosima munda wemizambiringa nezvaakawana namaoko ake.

¹⁷Anoita basa rake nesimba; maoko ake akasimba kuti aite mabasa ake.

¹⁸Anoona kuti kushambadzira kwake kunobatsira, uye mwenje wake haudzimi pausiku.

¹⁹Muruoko rwake anobata chirukiso, uye anobata chirukwa neminwe yake.

²⁰Anotambanudzira maoko ake kuvarombo, uye anotandavadzira maoko ake kune vanoshayiwa.

²¹Kana kwotonhora, haatyire mhuri yake; nokuti vose vakapfeka nguo dzinodziya.

²²Anozvigadzirira zvokuwaridza panhoo yake; anozvipfekedza nguo yomucheka wakaisvonaka, uye nomucheka wepepuru.

²³Murume wake anoremekedzwa pasuo reguta, kana agere pakati pavakuru venyika.

²⁴Mudzimai anoita nguo dzemicheka yakanaka agodzitengesa, uye anotengesera vanotengesa micheka yokumonera muhuro.

²⁵Simba nokukudzwa ndizvo nguo dzake; anofara akatarisana namazuva anouya.

²⁶Anotaura nouchenjeri, uye kurayira kwakatendeka kuri parurimi rwake.

²⁷Anotarira zvakanaka mararamiro emhuri yake, uye haadyi zvokudya zvousimbe.

²⁸Vana vake vanosimuka vagomuti akaropafadzwa, murume wakewo, anomurumbidza:

²⁹“Vakadzi vazhinji vanoita zvinhu zvakanaka, asi iwe unovakunda vose.”

³⁰Zvinofadza zvinonyengera, uye runako ndorwenguva duku; asi mukadzi anotya Jehovha anofanira kurumbidzwa.

³¹Mupeiwo mubayiro wake waakashandira, uye mabasa ake ngaamupe kurumbidzwa pasuo reguta.