Read Bhaibheri Dzvene MuChiShona Chanhasi Zvirevo 4 Bible Online

Zvirevo 4 - Bhaibheri Dzvene MuChiShona Chanhasi bible

Zvirevo 4

¹Teererai, vanakomana vangu, kurayira kwababa venyu; nyatsoteererai mugowana kunzwisisa.

²Ndinokupai dzidziso yakanaka, saka regai kurasa dzidziso yangu.

³Pandakanga ndiri mukomana mumba mababa vangu, ndichiri muduku uye mwana mumwe chete wamai vangu,

⁴baba vangu vakandidzidzisa vachiti, “Mwoyo wako ngaubatisise mashoko angu; chengeta mirayiro yangu ugorarama.

⁵Wana uchenjeri, wana kunzwisisa; usakanganwa mashoko angu kana kubva paari.

⁶Usarasa uchenjeri, ipapo huchakuchengeta; hude, ihwo hugokurinda.

⁷Uchenjeri chinhu chikuru; naizvozvo wana uchenjeri. Kunyange huchikutorera zvose zvaunazvo, wana kunzwisisa.

⁸Uhukudze; ipapo huchakusimudzira; uhumbundikire, ipapo huchakukudza.

⁹Huchakupfekedza chishongo chenyasha mumusoro mako, uye huchakupa korona yokubwinya.”

¹⁰Teerera, mwanakomana wangu, gamuchira zvandinotaura, ipapo makore oupenyu hwako achava mazhinji.

¹¹Ndinokudzidzisa nzira youchenjeri uye ndiri kukutungamirira panzira dzakarurama.

¹²Paunofamba, tsoka dzako hadzingapinganidzwi, paunomhanya, haungagumburwi.

¹³Batisisa kurayirwa, usarega kuchienda; nyatsokurinda zvakanaka, nokuti ndihwo upenyu hwako.

¹⁴Usaisa rutsoka panzira dzavakaipa, kana kufamba panzira dzavanhu vakaipa.

¹⁵Udzinzvenge, usafamba padziri; tsauka padziri ugopfuurira mberi.

¹⁶Nokuti havangavati vasati vaita zvakaipa; havangabatwi nehope kusvikira vaita kuti mumwe munhu aputsike.

¹⁷Vanodya zvokudya zvezvakaipa, uye vanonwa waini yezvechisimba.

¹⁸Nzira yavakarurama yakafanana nechiedza chamambakwedza, chinoramba chichiwedzera kubwinya kusvikira pachiedza chamasikati makuru.

¹⁹Asi nzira yavakaipa yakaita serima guru; havazivi zvinoita kuti vagumburwe.

²⁰Mwanakomana wangu, nyatsoteerera zvandinotaura; teereresa kumashoko angu.

²¹Usaite kuti abve pameso ako, achengete pakati pomwoyo wako;

²²nokuti upenyu kuna avo vanoawana uye noutano kumuviri wose womunhu.

²³Pamusoro pazvo zvose, chengetedza mwoyo wako, nokuti ndicho chitubu choupenyu.

²⁴Bvisa zvinotsausa pamuromo wako; kutaura kwakaora ngakuve kure nemiromo yako.

²⁵Meso ako ngaatarire mberi bedzi, ramba wakatarira mberi kwako.

²⁶Gadzirira tsoka dzako gwara ugofamba munzira dzakasimba chete.

²⁷Usatsaukira kurudyi kana kuruboshwe; chengetedza rutsoka rwako kuti rusaende pane zvakaipa.