Read Bhaibheri Dzvene MuChiShona Chanhasi Zvirevo 5 Bible Online

Zvirevo 5 - Bhaibheri Dzvene MuChiShona Chanhasi bible

Zvirevo 5

¹Mwanakomana wangu, nyatsoteerera kuuchenjeri hwangu, teereresa kumashoko angu oungwaru,

²kuti ugare wakachengeta kungwara uye kuti miromo yako ichengetedze zivo.

³Nokuti miromo yomukadzi chifeve inodonha uchi, nomutauriro wake unotedza kupfuura mafuta;

⁴asi pakupedzisira anovava senduru, anopinza somunondo unocheka namativi ose.

⁵Tsoka dzake dzinoenda kurufu; nhambwe dzake dzinonanga kuguva.

⁶Haafungi pamusoro penzira youpenyu; nzira dzake dzakaminama, asi iye haazvizivi.

⁷Saka zvino, vanakomana vangu, nditeererei; musatsauka pane zvandinotaura.

⁸Fambai nenzira iri kure naye, musasvika pedyo nomusuo wemba yake,

⁹kuti murege kupa vamwe zvakanaka zvesimba renyu, uye namakore enyu kuno uyo ane utsinye,

¹⁰kuti vatorwa varege kudya upfumi hwenyu, uye kushanda kwenyu nesimba kurege kupfumisa imba yomumwe munhu.

¹¹Pakupedzisira kwoupenyu hwako uchagomera, kana nyama nomuviri wako zvaparadzwa.

¹²Uchazoti, “Mavengero andaiita kurayirwa! Mashorero aiita mwoyo wangu kudzorwa!

¹³Ndakanga ndisingateereri vadzidzisi vangu, kana kunzwa varairidzi vangu.

¹⁴Ndasvika pakuparara chaiko pakati peungano yose.”

¹⁵Inwa mvura pachirongo chako chaicho, mvura inoerera patsime rako chairo.

¹⁶Ko, zvitubu zvako zvinofanira kuerera mumigwagwa here; nzizi dzako dzemvura pazvivara?

¹⁷Ngadzive dzako woga, hadzitombofaniri kugoveranwa navatorwa.

¹⁸Tsime rako ngariropafadzwe, uye ufadzwe nomudzimai woujaya hwako.

¹⁹Sehadzi yengururu inofadza, nehadzi yenondo yakanaka, mazamu ake ngaakufadze nguva dzose, ugare uchigutswa norudo rwake.

²⁰Unosungirweiko, mwanakomana wangu, nomukadzi chifeve? Unombundikirireiko chipfuva chomukadzi womumwe murume?

²¹Nokuti nzira dzomunhu dziri pachena pamberi paJehovha, uye anoongorora nzira dzake dzose.

²²Zviito zvakaipa zvomunhu akaipa zvichamusunga; tambo dzechivi chake dzichamubata iye kwazvo.

²³Achafa nokuda kwokushayiwa kuzvibata kwake, atsauswa noupenzi hwake hukuru.