Read Bhaibheri Dzvene MuChiShona Chanhasi Zvirevo 6 Bible Online

Zvirevo 6 - Bhaibheri Dzvene MuChiShona Chanhasi bible

Zvirevo 6

¹Mwanakomana wangu, kana uchinge waita rubatso kumuvakidzani wako, kana uchinge waita mhiko nokumbunda noruoko rwako kuno mumwe,

²kana uchinge wasungwa nokuda kwezvawakataura, wabatwa namashoko omuromo wako,

³ipapo ita izvi, mwanakomana wangu, kuti uzvisunungure, sezvo wawira mumaoko omuvakidzani wako! Enda undozvininipisa; ukumbire zvikuru kumuvakidzani wako!

⁴Usatendera meso ako hope, usatendera meso ako kutsumwaira.

⁵Zvipukunyutse, semhara kubva paruoko rwomuvhimi, seshiri kubva paugombe hwomuteyi.

⁶Enda kusvosve, iwe simbe; cherechedza nzira dzaro ugova wakachenjera!

⁷Harina mutungamiri, mutariri kana mutongi,

⁸asi rinochengeta zvokudya zvaro muzhizha, uye rinounganidza zvokudya zvaro pakukohwa.

⁹Uchasvika riniko wakarara ipapo, iwe simbe? Uchamuka riniko kubva pahope dzako?

¹⁰Kumbovata zvishomanana, kumbotsumwaira zvishomanana, kumbopeta maoko zvishomanana kuti ndizorore.

¹¹Naizvozvo urombo huchauya kwauri segororo, uye kushayiwa somurwi akashonga nhumbi dzokurwa.

¹²Munhu asina maturo uye anoita zvakaipa, anofamba-famba achitaura zvakaora,

¹³anochonya nameso ake, anonongedzera netsoka dzake, uye anodudzira neminwe yake,

¹⁴anoronga zvakaipa nounyengeri mumwoyo make, iyeyo anogaromutsa kupesana.

¹⁵Naizvozvo njodzi ichamuwira munguva shoma shoma; achaparadzwa nokukurumidza, pasina chingamubatsira.

¹⁶Pane zvinhu zvitanhatu zvakavengwa naJehovha, zvinomwe zvinomunyangadza zvinoti:

¹⁷meso anozvikudza, rurimi runoreva nhema, maoko anodeura ropa risina mhosva,

¹⁸mwoyo unoronga mano akaipa, tsoka dzinokurumidza kumhanyira muzvakaipa,

¹⁹chapupu chenhema chinodurura nhema, uye munhu anomutsa kupesana pakati pehama.

²⁰Mwanakomana wangu, chengetedza mirayiro yababa vako, uye usarasa kudzidzisa kwamai vako.

²¹Zvisungirire pamwoyo wako nokusingaperi; uzvishonge pamutsipa wako.

²²Paunofamba zvichakutungamirira; paucharara, zvichakurinda; pauchamuka, zvichataura newe.

²³Nokuti mirayiro iyi ndiyo mwenje kwauri, dzidziso iyi ndiyo chiedza, uye kudzora kwokurayira ndiko nzira youpenyu,

²⁴kunokuchengetedza pamukadzi asingazvibati, kubva parurimi runonyengera rwomudzimai asingazvibati.

²⁵Usachiva runako rwake mumwoyo mako, kana kumurega achikubata namaziso ake,

²⁶nokuti chifeve chinokuderedza kusvikira wafanana nechingwa, uye mukadzi womumwe asi ari chifeve anoendesa upenyu hwako chaihwo kurufu.

²⁷Ko, munhu angaisa moto pamakumbo ake, nguo dzake dzikasatsva here?

²⁸Ko, munhu angafamba pamazimbe anopisa, tsoka dzake dzikasatsva here?

²⁹Ndizvo zvakaita uyo anorara nomudzimai womumwe murume; hapana angabate mukadzi iyeyo akasarangwa.

³⁰Vanhu havazvidzi mbavha kana ikaba kuti ipedze nzara yayo painenge yoziya.

³¹Asi kana akabatwa, anofanira kuripa kakapetwa kanomwe, kunyange zvichimutorera pfuma yose yeimba yake.

³²Asi munhu anoita upombwe, anoshayiwa njere; ani naani anozviita anozviparadza iye pachake.

³³Kurohwa nokunyadziswa ndiwo mugove wake, uye kunyadziswa kwake hakungatongobviswi;

³⁴nokuti godo rinomutsa hasha dzomurume, uye haanganzwiri tsitsi kana otsiva.

³⁵Haangagamuchiri muripo upi zvawo; acharamba fufuro, kunyange rakakura sei.