Read Bhaibheri Dzvene MuChiShona Chanhasi Zvirevo 7 Bible Online

Zvirevo 7 - Bhaibheri Dzvene MuChiShona Chanhasi bible

Zvirevo 7

¹Mwanakomana wangu, chengeta mashoko angu ugoviga mirayiro yangu mauri.

²Chengeta mirayiro yangu ugorarama; uchengete dzidziso dzangu semboni yeziso rako.

³Uzvisungirire paminwe yako; uzvinyore pahwendefa yomwoyo wako.

⁴Uti kuuchenjeri, “Uri hanzvadzi yangu,” uye uti kunzwisisa ndiyo hama yako;

⁵zvichakuchengeta kure nomukadzi chifeve; kubva pamudzimai asingazvibati anokwezva namashoko ake.

⁶Napawindo remba yangu ndakatarira panze nomumagirazi.

⁷Ndakaona pakati pavasina mano ndikacherechedza pakati pamajaya, rimwe jaya rakanga risina njere.

⁸Rakanga richidzika nomugwagwa pedyo nepakona yomukadzi uya, richifamba rakananga kumba kwake,

⁹panguva yorubvunzavaeni, zuva ravira, kunze kwosviba.

¹⁰Ipapo mukadzi akabuda kuzosangana naye, akapfeka sechifeve uye azere nounyengeri.

¹¹Anotaura noruzha uye anozvikudza, tsoka dzake hadzigari pamba;

¹²imwe nguva ari munzira, imwe nguva ari pazvivara. Anorindira pamakona ose.

¹³Akamubata ndokumutsvoda, uye nechiso chisina nyadzi akati:

¹⁴“Ndine zvipiriso zvokuwadzana kumba kwangu; nhasi ndazadzisa mhiko dzangu.

¹⁵Saka ndauya kuzosangana newe; ndanga ndichikutsvaka, zvino ndazokuwana!

¹⁶Ndawaridza mubhedha wangu machira ane mavara, anobva kuIjipiti.

¹⁷Ndasasa zvinonhuhwira pamubhedha wangu, zvinoti: mura, gavakava nesinamoni.

¹⁸Uya, tinwe tigute norudo kusvikira mangwanani; ngatifare zvedu norudo!

¹⁹Murume wangu haako kumba, akafamba rwendo rurefu.

²⁰Akatakura homwe yake izere nemari uye haangadzoki kumba kusvikira pajenaguru.”

²¹Namashoko okunyengetedza akamutsausa; akamukwezva nokutaura kwake kunonyengera.

²²Pakarepo akamutevera senzombe inoenda kundobayiwa, senondo inopinda mumusungo,

²³kusvikira museve wabaya chiropa chake, seshiri inokurumidza kupinda muugombe, asingazivi kuti zvichamuurayisa.

²⁴Saka zvino, vanakomana vangu, teererai kwandiri; nyatsoteererai zvandinotaura.

²⁵Usarega mwoyo wako uchitsaukira kunzira dzake, kana kurasikira pamakwara ake.

²⁶Vazhinji vakakuvadzwa naye vakawisirwa pasi; vaakauraya vakawanda kwazvo.

²⁷Imba yake mugwagwa mukuru unoenda kuguva, uchitungamirira kumakamuri orufu.