Read Bhaibheri Dzvene MuChiShona Chanhasi Zvirevo 8 Bible Online

Zvirevo 8 - Bhaibheri Dzvene MuChiShona Chanhasi bible

Zvirevo 8

¹Ko, uchenjeri hahudanidziri here? Kunzwisisa hakusimudziri inzwi rako here?

²Panzvimbo dzakakwirira panzira, pamharadzano dzenzira, ndipo pahumire;

³parutivi rwamasuo okupinda muguta, pamikova, hunodanidzirisa huchiti,

⁴“Kwamuri, imi varume, ndinodanidzira; ndinosimudzira inzwi rangu kuvanhu vose.

⁵Imi vasina mano, wanai uchenjeri; imi mapenzi, wanai kunzwisisa.

⁶Teererai, nokuti ndine zvinhu zvinokosha zvokutaura; ndinozarura muromo wangu kuti nditaure zvakarurama.

⁷Muromo wangu unotaura zvokwadi, nokuti miromo yangu inovenga zvakaipa.

⁸Mashoko ose omuromo wangu akarurama; hapana kana rimwe rakakombama kana rakaipa.

⁹Kune ane njere ose zvawo akarurama, akarurama kuna avo vane zivo.

¹⁰Sarudza kurayira kwangu panzvimbo yesirivha, ruzivo panzvimbo yegoridhe rakaisvonaka,

¹¹nokuti uchenjeri hunokosha kupfuura marubhi, uye hapana chaungada chingaenzaniswa nahwo.

¹²“Ini, uchenjeri ndinogara pamwe chete navakachenjera; ndine ruzivo nenjere.

¹³Kutya Jehovha ndiko kuvenga zvakaipa; ndinovenga kuzvikudza namanyawi, maitiro akaipa nokutaura kunonyangadza.

¹⁴Zano nokutonga kwakanaka ndezvangu; ndine kunzwisisa nesimba.

¹⁵Madzimambo anobata ushe neni uye vatongi vanodzika mirayiro yakarurama;

¹⁶machinda anofambisa ushe neni, navakuru vose vanotonga panyika.

¹⁷Ndinoda avo vanondida, uye vaya vanonditsvaka vanondiwana.

¹⁸Pfuma nokukudzwa zvineni, upfumi hunogara nokururama.

¹⁹Chibereko changu chakanaka kupfuura goridhe rakaisvonaka; zvandinobereka zvinopfuura sirivha yakaisvonaka.

²⁰Ndinofamba munzira dzokururama, pamakwara okururamisira,

²¹ndichipa upfumi kuna avo vanondida, uye ndichiita kuti matura avo azare.

²²“Jehovha akandibudisa sebasa rake rokutanga pamabasa ake, kutangira mabasa ake akare;

²³ndakagadzwa kubva pakusingaperi, kubva pakutanga, nyika isati yavapo.

²⁴Makungwa asati avapo, ndakaberekwa, pasati pava nezvitubu zvine mvura zhinji;

²⁵makomo asati aiswa munzvimbo dzawo, zvikomo zvisati zvavapo, ndakaberekwa,

²⁶asati aita nyika neminda kana guruva ripi zvaro renyika.

²⁷Ndakanga ndiripo paakaisa matenga munzvimbo dzawo, paakaita denderedzwa pamusoro pamakungwa,

²⁸paakaita makore kudenga uye paakasimbisa zvitubu zvamakungwa,

²⁹paakapa gungwa miganhu yaro kuti mvura dzirege kudarika zvaakarayira, uye paakateya nheyo dzenyika.

³⁰Ipapo ndini ndaiva mhizha parutivi rwake. Ndaigara ndichifara zuva nezuva, ndichifara nguva dzose pamberi pake,

³¹ndichifadzwa nenyika yake yose uye ndichifadzwa navanhu vose.

³²“Saka zvino, vanakomana vangu, teererai kwandiri; vakaropafadzwa avo vanochengeta nzira dzangu.

³³Teererai kurayira kwangu mugova vakachenjera; musakushayira hanya.

³⁴Akaropafadzwa munhu anoteerera kwandiri, anorinda mazuva ose pamasuo angu. Anomira pamukova womusuo wangu.

³⁵Nokuti ani naani anondiwana anowana upenyu uye anogamuchira nyasha kubva kuna Jehovha.

³⁶Asi ani naani asingandiwani anozvikuvadza; vose vanondivenga vanoda rufu.”