Read Bhaibheri Dzvene MuChiShona Chanhasi Zvirevo 9 Bible Online

Zvirevo 9 - Bhaibheri Dzvene MuChiShona Chanhasi bible

Zvirevo 9

¹Uchenjeri hwakavaka imba yahwo; hwakaveza mbiru dzahwo nomwe.

²Hwakabika nyama yahwo; uye hukagadzira waini yahwo; hwakagadzirawo tafura yahwo.

³Hwakatuma varandakadzi vahwo, uye hunodanidzira kubva panzvimbo yakakwirira kwazvo yeguta.

⁴Kuna avo vanoshayiwa njere hunoti, “Vose vasina uchenjeri ngavauye muno!

⁵Uyai, mudye zvokudya zvangu munwe waini yandagadzira.

⁶Siyai nzira dzenyu dzisina mano mugorarama; fambai munzira yokunzwisisa.

⁷“Ani naani anorayira mudadi anozvitsvakira kutukwa; ani naani anotsiura munhu akaipa anozviwanira kutukwa.

⁸Usatsiura mudadi kuti arege kukuvenga; tsiura munhu akachenjera uye achakuda.

⁹Rayira munhu akachenjera uye achawedzera uchenjeri hwake; dzidzisa munhu akarurama uye achawedzera kudzidza kwake.

¹⁰“Kutya Jehovha ndiwo mavambo ouchenjeri, uye kuziva Iye Mutsvene ndiko kunzwisisa.

¹¹Nokuti neni mazuva ako achava mazhinji, uye makore achawedzerwa kuupenyu hwako.

¹²Kana uri wakachenjera, uchenjeri hwako huchakupa mubayiro; kana uri mudadi, iwe woga ndiwe uchatambura.”

¹³Mukadzi benzi ane ruzha; haana kudzikama uye haana zivo.

¹⁴Anogara pamusuo wemba yake, napachigaro chiri panzvimbo yakakwiririsa yeguta,

¹⁵achidanidzira kuna avo vanenge vachipfuura napo, vaya vanofamba zvakarurama nenzira yavo.

¹⁶Anoti kuna vaya vasina njere, “Vose vasina mano ngavauye muno!

¹⁷Mvura yakabiwa inozipa; zvokudya zvinodyirwa muchivande zvinonaka!”

¹⁸Asi zvavasingazivi ndezvokuti mune vakafa, uye kuti vanomushanyira vari mukati kati meguva.