Read Bhaibheri Dzvene MuChiShona Chanhasi Muparidzi 10 Bible Online

Muparidzi 10 - Bhaibheri Dzvene MuChiShona Chanhasi bible

Muparidzi 10

¹Nhunzi dzakafa dzinonhuwisa mafuta akanaka, saizvozvowo upenzi hushoma hunorema kukunda uchenjeri nokukudzwa.

²Mwoyo womunhu akachenjera unosimbira kurudyi, asi mwoyo webenzi unosimbira kuruboshwe.

³Kunyange richifamba pamugwagwa, benzi rinoshayiwa njere uye rinoratidza vanhu vose upenzi hwaro.

⁴Kana kutsamwa kwomutongi kukakumukira, usabva panzvimbo yako; unyoro hunonyaradza mhosva huru.

⁵Kune chinhu chakaipa chandakaona pasi pezuva, kutadza kunobva kuvatongi:

⁶Mapenzi anoiswa munzvimbo zhinji dzapamusoro, ipapo vapfumi vachitora nzvimbo dzakaderera.

⁷Ndakaona varanda vakatasva mabhiza, ipapo machinda achifamba pasi netsoka savaranda.

⁸Ani naani anochera gomba angangowira mariri; ani naani anopwanya naparusvingo angangorumwa nenyoka.

⁹Ani naani anopwanya matombo angangokuvadzwa nawo; ani naani anotsemura matanda angangozviisa panjodzi nawo.

¹⁰Kana demo rakagomara uye rikasarodzwa, panodiwa simba rakawanda, asi unyanzvi hunouyisa kubudirira.

¹¹Kana nyoka ikaruma mupingudzi asati aibata, mupingudzi haachabatsiri.

¹²Mashoko anobva mumuromo momunhu akachenjera ane unyoro, asi benzi rinomedzwa nomuromo waro.

¹³Kutanga kwamashoko ake upenzi; nokuguma kwokutaura kwake mupengo wakashata.

¹⁴Uye benzi rinowanza mashoko. Hapana munhu anoziva zvichauya, ndiani angamuudza zvichaitika shure kwake?

¹⁵Basa rebenzi rinomunetesa; haazivi nzira inoenda kuguta.

¹⁶Une nhamo iwe nyika ina mambo aiva muranda uye ina machinda anoita mabiko mangwanani.

¹⁷Wakaropafadzwa iwe nyika ina mambo akaberekwa mukukudzwa uye ina machinda anodya panguva yakafanira, kuti vasimbiswe kwete kuti vadhakwe.

¹⁸Kana munhu ari simbe, denga remba rinosakara; kana achigarira maoko, imba inobvinza.

¹⁹Mabiko anoitirwa kuseka, uye waini inofadza upenyu, asi mari imhinduro kune zvose.

²⁰Usatuka mambo kunyange mupfungwa dzako, kana kutuka mupfumi paimba yako yokuvata, nokuti shiri yedenga ingangotakura mashoko ako, uye china mapapiro chingangozivisa zvawataura.