Read Bhaibheri Dzvene MuChiShona Chanhasi Rwiyo Rukuru rwaSoromoni 1 Bible Online

Rwiyo Rukuru rwaSoromoni 1 - Bhaibheri Dzvene MuChiShona Chanhasi bible

Rwiyo Rukuru rwaSoromoni 1

¹Rwiyo Rukuru rwaSoromoni:

²Ngaanditsvode hake nokutsvoda kwomuromo wake. Nokuti rudo rwako runofadza kupfuura waini.

³Kunhuhwirira kwamafuta enyu kunofadza; zita renyu rakafanana namafuta anonhuwirira adururwa. Hazvishamisi kuti mhandara dzinokudai!

⁴Nditorei muende neni, ngatikurumidzei. Mambo ngaandipinze mudzimba dzake dzomukati. Tinokupembererai uye tinokufarirai; ticharumbidza rudo rwenyu kupfuura waini. Regai zvenyu mhandara dzikudei!

⁵Kusviba ndakasviba zvangu, asi ndakanaka hangu, vanasikana veJerusarema, ndakasviba samatende eKedhari, sezvidzitiro zvetende raSoromoni.

⁶Musanditarisisa nokuda kwoutema hwangu, nokuti ndakasvibiswa nezuva. Vanakomana vamai vangu vakanditsamwira vakandiita kuti ndichengete minda yemizambiringa; munda wangu chaiwo wemizambiringa ndakaushayira nguva.

⁷Ndiudze, iwe mudiwa wangu, kwaunofudzira makwai ako nokwaunozorodzera makwai ako masikati. Ko, ndichaitirei somukadzi akafukidza chiso chake pedyo namakwai eshamwari dzako?

⁸Kana usingazivi, iwe mukadzi akanaka kukunda vamwe, chitevera makwara amakwai ugondofudzira mbudzana dzako pedyo namatende avafudzi.

⁹Ndinokufananidza, iwe mudiwa wangu, nebhiza rakasungwa pane imwe yengoro dzaFaro.

¹⁰Matama ako akashongedzwa zvakanaka nemhete, mutsipa wako nezvuma zvamatombo anokosha.

¹¹Tichakugadzirira mhete dzenzeve dzegoridhe nesirivha.

¹²Mambo paakanga agere patafura yake, munhuwi wamafuta andainge ndazora wakapararira.

¹³Mudiwa wangu, kwandiri akaita sakahomwe kemura kanogara pakati pamazamu angu.

¹⁴Mudiwa wangu, kwandiri akaita sesumbu ramaruva machena anobva mubindu remizambiringa yeEni Gedhi.

¹⁵Kunaka here kwawakaita uku, mudiwa wangu! A-a, wakazonaka! Meso ako injiva chaidzo!

¹⁶Wakanaka sei, mudiwa wangu! A-a, unofadza! Uye mubhedha wedu wakasvibira.

¹⁷Nhungo dzeimba yedu ndedzomusidhari; mbariro dzacho ndedzomupaini.