Read Bhaibheri Dzvene MuChiShona Chanhasi Rwiyo Rukuru rwaSoromoni 2 Bible Online

Rwiyo Rukuru rwaSoromoni 2 - Bhaibheri Dzvene MuChiShona Chanhasi bible

Rwiyo Rukuru rwaSoromoni 2

¹Ndiri ruva reSharoni, ruva romumipata.

²Seruva riri pakati peminzwa, ndizvo zvakaita mudiwa wangu pakati pemhandara.

³Somuti womuapuro pakati pemiti yesango, ndizvo zvawakaita mudiwa wangu pakati pamajaya. Ndinofarira kugara mumumvuri wake, uye muchero wake unondinakira kuudya.

⁴Akaenda neni kuimba yamabiko, uye mureza wake pamusoro pangu ndirwo rudo.

⁵Ndisimbise namazambiringa akaomeswa, ndisimbise namaapuro; nokuti ndoziya norudo.

⁶Ruoko rwake rworuboshwe rwuri pasi pomusoro wangu, uye ruoko rwake rworudyi rwakandimbundikira.

⁷Imi vanasikana veJerusarema ndinokupikirai nemhara uye nenondo dzesango: Musazunguza kana kumutsa rudo kusvikira irwo rwada rwoga.

⁸Inzwai! Inzwi romudiwa wangu! Tarirai! Hoyo ouya achiuruka nomumakomo, achikwakuka nomuzvikomo.

⁹Mudiwa wangu akafanana nemhara kana netsvana yenondo. Tarirai! Hoyo amira seri kworusvingo rwedu, akatarira napamawindo achidongorera napamaburi apamawindo.

¹⁰Mudiwa wangu akataura kwandiri akati, “Simuka, mudiwa wangu, iwe munakunaku wangu, uya tiende tose.

¹¹Tarira! Nguva yechando yapera; mvura yapera; uye haichanayi.

¹²Maruva oonekwa panyika; nguva yokuimba yasvika, kurira kwenjiva kwonzwikwa munyika yedu.

¹³Muonde wobereka michero yawo yokutanga; uye mizambiringa yotunga maruva ayo anonhuhwira kwazvo. Simuka, uya, mudiwa wangu; munakunaku wangu, uya tiende tose.”

¹⁴Njiva yangu iri mumikaha yedombo, munzvimbo dzokuvanda mumativi egomo, ndiratidze chiso chako, ndinoda kunzwa inzwi rako; nokuti inzwi rako rinotapira, uye chiso chako chinoyevedza.

¹⁵Tibatirei makava, ivo vana vemakava anoparadza minda yemizambiringa, iyo mizambiringa yedu yotunga maruva.

¹⁶Mudiwa wangu ndewangu uye ndiri wake; anofamba-famba pakati pamaruva omubani.

¹⁷Kusvikira zuva rabuda uye mimvuri yatiza, pinduka, mudiwa, ubve waita semhara kana tsvana pamusoro pezvikomo.