Read Bhaibheri Dzvene MuChiShona Chanhasi Rwiyo Rukuru rwaSoromoni 7 Bible Online

Rwiyo Rukuru rwaSoromoni 7 - Bhaibheri Dzvene MuChiShona Chanhasi bible

Rwiyo Rukuru rwaSoromoni 7

¹Dzakanaka sei tsoka dzako dzakapfekedzwa shangu, iwe mwanasikana womuchinda! Makumbo ako akanakisisa akaita sezvishongo, basa ramaoko emhizha.

²Guvhu rako rakatenderera somukombe unogara uine waini yakasanganiswa zvakanaka. Chiuno chako murwi wegorosi wakakomberedzwa namaruva.

³Mazamu ako akaita setsvana mbiri, mapatya emhara.

⁴Mutsipa wakaita seshongwe yakagadzirwa nenyanga dzenzou. Meso ako ndiwo madziva eHeshibhoni pasuo reBhati Rabhimi. Mhuno yako yakaita seshongwe yeRebhanoni yakatarisa kudivi reDhamasiko.

⁵Musoro wako unokushongedza nekorona seGomo reKarimeri. Bvudzi rako rakaita sezvirukwa zvomumba mamambo; mwoyo wamambo wakabatwa nokugadzirwa kwebvudzi rako.

⁶Wakanaka uye unofadza sei, iwe mudiwa nezvinofadza zvako!

⁷Chimiro chako chakaita somuti womuchindwe; uye mazamu ako samasumbu omuchero.

⁸Ndakati, “Ndichakwira muchindwi uyu, ndigobata muchero wawo.” Mazamu ako ngaaite samasumbu omuzambiringa, munhuwi wokufema kwako uite samaapuro,

⁹muromo wako ugoita sewaini yakanakisisa. Waini ngaiendeswe kumudiwa wangu chaiko, igoyerera zvinyoronyoro, napamiromo yake nameno ake.

¹⁰Ini ndiri womudiwa wangu, uye iye anondishuva.

¹¹Uya, mudiwa wangu, ngatiendei kumunda, tigozopedza usiku hwose kumaruwa.

¹²Ngatimukirei kuminda yemizambiringa tindoona kana mizambiringa yakabukira, uye kana maruva awo azaruka, uye kana mitamba yatumbuka yava namaruva, ikoko ndiko kwandichakupa rudo rwangu.

¹³Miti yemidiwadiwa inopa kunhuhwira kwayo, uye pamusuo pedu pane zvinonaka zvose, zvose zvitsva nezvitsaru, zvandakachengetera iwe, mudiwa wangu.