Read Bhaibheri Dzvene MuChiShona Chanhasi Kuungudza kwaJeremia 3 Bible Online

Kuungudza kwaJeremia 3 - Bhaibheri Dzvene MuChiShona Chanhasi bible

Kuungudza kwaJeremia 3

¹Ndini munhu akaona kutambudzika neshamhu yehasha dzake.

²Akandidzingira kure akaita kuti ndifambe murima panzvimbo yomuchiedza;

³zvirokwazvo, akashandura ruoko rwake kuti rundirwise nguva nenguva, zuva rose.

⁴Akasakadza ganda rangu nenyama yangu uye akavhuna mapfupa angu.

⁵Akandikomba akandipoteredza neshungu nokurwadziswa.

⁶Akandigarisa murima savanhu vakafa kare kare.

⁷Akandipfigira kuti ndisapunyuka, akandiremedza nengetani.

⁸Kunyange ndikadana kana kuridza mhere kuti ndibatsirwe, anopfigira munyengetero wangu kunze.

⁹Akadzivira nzira yangu namatombo; akaminamisa nzira dzangu.

¹⁰Sebere rakavandira, seshumba yakavanda,

¹¹akandikwekweredza kubva munzira uye akandibvarura-bvarura akandisiya ndisina mubatsiri.

¹²Akawembura uta hwake akandiita chinhu chinonangwa nemiseve yake.

¹³Akabaya mwoyo wangu nemiseve yaibva mugoba rake.

¹⁴Ndakava chiseko chavanhu vangu vose; vakandihomera nenziyo pazuva rose.

¹⁵Akandigutsa nemiriwo inovava, uye akandinwisa nduru.

¹⁶Akagura mazino angu nerukangarabwe; akanditsokodzera muguruva.

¹⁷Ndakatorerwa rugare; ndakakanganwa kuti kubudirira chii.

¹⁸Naizvozvo ndinoti, “Kubwinya kwangu kwaenda, uye nezvose zvandanga ndakatarisira kuna Jehovha.”

¹⁹Ndinorangarira kutambudzika kwangu nokudzungaira kwangu, kurwadziwa uye nenduru.

²⁰Ndinozvirangarira kwazvo, uye mweya wangu wasuruvara mukati mangu.

²¹Asi izvi ndinozvirangarira mupfungwa uye naizvozvo ndine tariro:

²²Nokuda kwerudo rukuru rwaJehovha, hatina kuparadzwa, nokuti tsitsi dzake hadzitongoperi.

²³Itsva mangwanani oga oga, kutendeka kwenyu kukuru.

²⁴Ndinoti kumwoyo wangu, “Jehovha ndiye mugove wangu; naizvozvo ndichamumirira.”

²⁵Jehovha akanaka kuna avo vanovimba naye, kumunhu anomutsvaka;

²⁶chinhu chakanaka kumirira ruponeso rwaJehovha unyerere.

²⁷Chinhu chakanaka kuti munhu atakure joko achiri mudiki.

²⁸Ngaagare ari oga anyerere, nokuti Jehovha ndiye akariturika paari.

²⁹Ngaavige chiso chake muguruva, zvimwe tariro ichiripo.

³⁰Ngaape dama rake kumunhu anomurova, uye ngaazadzwe nenyadzi.

³¹Nokuti vanhu havangaraswi naIshe nokusingaperi.

³²Kunyange achiuyisa kusuwa, achanzwira hake tsitsi, rukuru sei rudo rwake rusingaperi.

³³Nokuti haafariri kuuyisa kurwadziwa kana kusuwa kuvana vavanhu.

³⁴Kutsikira pasi petsoka vasungwa vose venyika,

³⁵kurambira munhu kodzero yake pamberi peWokumusoro-soro,

³⁶kutadzisa munhu kuwana kururamisirwa kwake ko, Ishe haangaoni zvinhu zvakadai here?

³⁷Ndiani angataura akaita kuti zviitike kana Ishe asina kuzvirayira?

³⁸Ko, hazvibvi mumuromo weWokumusoro-soro here zvose zvakaipa nezvinhu zvakanaka zvinouya?

³⁹Ko, munhu mupenyu anonyunyutirei kana arangwa nokuda kwezvivi zvake?

⁴⁰Ngatinzverei nzira dzedu uye ngatidziedzei, uyewo ngatidzokerei kuna Jehovha.

⁴¹Ngatisimudzei mwoyo yedu namaoko edu kuna Mwari ari kudenga, tigoti:

⁴²“Takatadza uye takakumukirai uye imi hamuna kukanganwira.

⁴³“Makazvifukidza nokutsamwa mukatidzingirira; makauraya musinganzwiri ngoni.

⁴⁴Makazvifukidza negore kuti kurege kuva nomunyengetero ungasvikako.

⁴⁵Makatiita marara netsvina pakati pendudzi.

⁴⁶“Vavengi vedu vose vakashama miromo yavo kwazvo kuti vatituke.

⁴⁷Takawirwa nokutya uye takateyiwa nehunza, kuparara nokuparadzwa kukuru.”

⁴⁸Hova dzemisodzi dzinoyerera kubva mumaziso angu, nokuti vanhu vangu vaparadzwa.

⁴⁹Meso angu acharamba achiyerera misodzi, pasina zvinoyamura,

⁵⁰kusvikira Jehovha aringira pasi kubva kudenga akaona.

⁵¹Zvandinoona zvinochemedza mweya wangu, nokuda kwavakadzi vose veguta rangu.

⁵²Avo vakanga vari vavengi vangu ini pasina chikonzero vakandivhima seshiri.

⁵³Vakaedza kundiuraya mugomba uye vakapotsera matombo kwandiri;

⁵⁴mvura zhinji yakafukidza musoro wangu, uye ndakafunga kuti ndava pedyo nokufa.

⁵⁵Ndakadana zita renyu, imi Jehovha, ndiri mugomba rakadzika.

⁵⁶Makanzwa kukumbira kwangu: “Regai kudzivira nzeve dzenyu pandinochemera rubatsiro.”

⁵⁷Makaswedera pedyo pandakakudanai, mukati, “Usatya.”

⁵⁸Haiwa Ishe, makandireverera mhaka yangu; makadzikinura upenyu hwangu.

⁵⁹Makaona imi Jehovha, zvakaipa zvandakaitirwa. Nditongerei mhaka yangu!

⁶⁰Makaona udzamu hwokutsva kwavo, idzo rangano dzavo dzose pamusoro pangu.

⁶¹Haiwa Jehovha, makanzwa kutuka kwavo, idzo rangano dzavo dzose pamusoro pangu,

⁶²dzinozevezerwa nokungurumwa navavengi vangu pamusoro pangu zuva rose.

⁶³Tarirai kwavari! Vakagara kana kumira, vanondituka nenziyo dzavo.

⁶⁴Varipidzirei zvakavafanira, imi Jehovha, zvakaitwa namaoko avo.

⁶⁵Isai chidziro pamwoyo yavo, uye kutuka kwenyu ngakuve pamusoro pavo!

⁶⁶Vadzinganisei makatsamwa muvaparadze, vabve pasi pamatenga aJehovha.