Read Bhaibheri Dzvene MuChiShona Chanhasi Kuungudza kwaJeremia 5 Bible Online

Kuungudza kwaJeremia 5 - Bhaibheri Dzvene MuChiShona Chanhasi bible

Kuungudza kwaJeremia 5

¹Rangarirai Jehovha, zvakatiwira; tarirai, mugoona kunyadziswa kwedu.

²Nhaka yedu yakapiwa kuvatorwa, misha yedu kumabvakure.

³Tava nherera, hatina vabereki, vanamai vedu sechirikadzi.

⁴Tinofanira kutenga mvura yatinonwa; huni dzedu dzinongowanikwa chete nomutengo.

⁵Avo vanotidzinganisa vari pedyo pedyo; taneta uye hatina zororo.

⁶Takazviisa pasi peIjipiti neAsiria, kuti tiwane chingwa chakakwana.

⁷Madzibaba edu akatadza uye vakafa, uye tava kurangwa nokuda kwavo.

⁸Varanda vanotitonga, uye hapana angatisunungura kubva pamaoko avo.

⁹Tinowana chingwa chedu nokuisa upenyu hwedu munjodzi, nokuda kwomunondo murenje.

¹⁰Ganda redu rava kupisa sechoto, nokuda kwokupisa kwenzara.

¹¹Vakachinya vakadzi muZioni, mhandara, mumaguta eJudha.

¹²Machinda akasungirirwa namaoko avo; vakuru havakudzwi.

¹³Majaya anoshanda paguyo; vakomana vanotatarika vakatakura mitoro yehuni.

¹⁴Vakuru vakabva pasuo reguta; majaya akarega kuimba kwavo.

¹⁵Mufaro mumwoyo medu waguma; kutamba kwedu kwapinduka kukava kuchema.

¹⁶Korona yawa kubva pamusoro wedu. Tine nhamo isu, nokuti takatadza!

¹⁷Nokuda kwaizvozvi mwoyo yedu yapera simba, nokuda kwezvinhu izvi meso edu otadza kuona,

¹⁸nokuti Gomo reZioni rava dongo, makava ofambamo.

¹⁹Imi Jehovha, munotonga nokusingaperi; chigaro chenyu choushe chiripo kuzvizvarwa zvose.

²⁰Sei muchigara muchitikanganwa? Sei muchitikanganwa kwenguva yakareba kudai?

²¹Tidzoserei kwamuri, Jehovha, kuti tigodzoka; vandudzai mazuva edu senguva yekare,

²²kana musina kutiramba zvachose kana kutitsamwira zvikuru kwazvo.