Read Bhaibheri Dzvene MuChiShona Chanhasi Numeri 13 Bible Online

Numeri 13 - Bhaibheri Dzvene MuChiShona Chanhasi bible

Numeri 13

¹Jehovha akati kuna Mozisi,

²“Tuma vamwe varume kuti vandosora nyika yeKenani, yandiri kupa kuvaIsraeri. Tuma mutungamiri mumwe kubva kurudzi rumwe norumwe rwamadzitateguru avo.”

³Saka, sokurayira kwaJehovha, Mozisi akavatuma vachibva nokurenje reParani. Vose vakanga vari vatungamiri vavaIsraeri.

⁴Haano mazita avo: kubva kurudzi rwaRubheni, Shamua mwanakomana waZakuri;

⁵kubva kurudzi rwaSimeoni, Shafati mwanakomana waHori;

⁶kubva kurudzi rwaJudha, Karebhu mwanakomana waJefune;

⁷kubva kurudzi rwaIsakari, Igari mwanakomana waJosefa;

⁸kubva kurudzi rwaEfuremu, Hoshea mwanakomana waNuni;

⁹kubva kurudzi rwaBhenjamini, Pareti mwanakomana waRafu;

¹⁰kubva kurudzi rwaZebhuruni, Gadhieri mwanakomana waSodhi;

¹¹kubva kurudzi rwaManase (rudzi rwaJosefa), Gadhi mwanakomana waSusi;

¹²kubva kurudzi rwaDhani, Amieri mwanakomana waGemari;

¹³kubva kurudzi rwaAsheri, Seturi mwanakomana waMikaeri;

¹⁴kubva kurudzi rwaNafutari, Nabhi mwanakomana waVhofisi;

¹⁵kubva kurudzi rwaGadhi, Generi mwanakomana waMaki.

¹⁶Aya ndiwo mazita avarume vakatumwa naMozisi kundosora nyika. (Mozisi akatumidza Hoshea mwanakomana waNuni zita rokuti Joshua).

¹⁷Mozisi akati avatuma kundosora nyika yeKenani, akati kwavari, “Kwidzai mupinde nechokuNegevhi uye nomunyika yamakomo.

¹⁸Mundoona kuti nyika yakadini uye kuti vanhu vanogarako vakasimba here kana kuti havana, vashoma here kana kuti vazhinji.

¹⁹Nyika yavanogara yakadini? Yakanaka here kana kuti yakaipa? Maguta avagere maari akadiniko? Haana masvingo here kana kuti akakomberedzwa?

²⁰Ko, ivhu racho rakadini? Rakaorera here kana kuti kwete? Mune miti here kana kuti hamuna? Muedze kwazvo kuti muuye nezvimwe zvezvibereko zvenyika iyo.” (Yakanga iri nguva yokutanga kuibva kwamazambiringa).

²¹Naizvozvo vakakwidza vakandosora nyika kubva kurenje reZini kusvikira kuRehobhi, kwakanangana neRebho Hamati.

²²Vakakwidza vachipinda nechokuNegevhi vakasvika kuHebhuroni paigara Ahimeni, Sheshai naTarimai, zvizvarwa zvaAnaki. (Hebhuroni rakanga ravakwa makore manomwe Zoani risati ravakwa muIjipiti).

²³Vakati vasvika paMupata weEshikori, vakatema davi rimwe raiva nesumbu ramazambiringa. Vaviri vavo vakaritakura nedanda pakati pavo pamwe chete namatamba uye namaonde.

²⁴Nzvimbo iyo yakanzi Mupata weEshikori nokuda kwesumbu ramazambiringa rakatemwa ipapo navaIsraeri.

²⁵Mazuva makumi mana akati apera, vakadzoka kubva kundosora nyika.

²⁶Vakadzokera kuna Mozisi naAroni nokuungano yose yavaIsraeri paKadheshi murenje reParani. Ipapo vakazivisa kwavari nokuungano yose uye vakavaratidza zvibereko zvenyika.

²⁷Vakapa nhoroondo iyi kuna Mozisi: “Takaenda kunyika yamakatituma, uye inoerera mukaka nouchi! Hezvi zvibereko zvayo.

²⁸Asi vanhu vanogarako vane simba kwazvo, uye maguta akakomberedzwa uye makuru kwazvo. Takaona kunyange zvizvarwa zvaAnaki ikoko.

²⁹VaAmareki vanogara nechokuNegevhi; vaHiti, vaJebhusi navaAmori vanogara munyika yamakomo; uye vaKenani vanogara pedyo negungwa uye nomunzvimbo inotevedza Jorodhani.”

³⁰Ipapo Karebhu akanyaradza vanhu pamberi paMozisi akati, “Tinofanira kukwidza tindotora nyika nokuti zvirokwazvo tinogona kuitora.”

³¹Asi varume vakanga vaenda naye vakati, “Hatigoni kurwisa vanhu ava; vakasimba kutipfuura isu.”

³²Saka vakaparadzira mashoko akaipa pakati pavaIsraeri pamusoro penyika yavakanga vandosora. Vakati, “Nyika yatakandosora inodya vaya vanogaramo. Vanhu vose vatakaona ikoko vakakura kwazvo.

³³Takaona vaNefirimi (izvo zvizvarwa zvavaAnaki vanobva kuvaNefirimi) ikoko. Isu tainge mhashu pakuona kwedu, uye tainge takadarowo pakuona kwavo.”