Read Bhaibheri Dzvene MuChiShona Chanhasi Mateo 14 Bible Online

Mateo 14 - Bhaibheri Dzvene MuChiShona Chanhasi bible

Mateo 14

¹Panguva iyoyo mambo Herodhi akanzwa nezvaJesu

²uye akati kuvaranda vake, “Uyu ndiJohani Mubhabhatidzi; amuka kubva kuvakafa! Ndokusaka masimba ezvishamiso achishanda maari.”

³Zvino Herodhi ainge abata Johani akamusunga achibva amuisa mutorongo nokuda kwaHerodhiasi mudzimai waFiripi, mununʼuna wake,

⁴sezvo Johani ainge ati kwaari, “Hautenderwi kutora mukadzi uyu.”

⁵Herodhi aida kuuraya Johani asi aitya vanhu nokuti vaimuona somuprofita.

⁶Asi zuva rokupemberera kuberekwa kwaHerodhi rakati rasvika, mwanasikana waHerodhiasi akatamba pamberi pavo uye zvikafadza Herodhi kwazvo,

⁷zvokuti akamuvimbisa nemhiko kuti aizomupa chipi nechipi chaaizokumbira.

⁸Arayirwa namai vake mwanasikana akati, “Ndipei pano musoro waJohani Mubhabhatidzi uri mundiro.”

⁹Mambo akasuwiswa nazvo, asi nokuda kwemhiko yake uye navaainge agere navo pakudya, akarayira kuti upiwe kwaari,

¹⁰ndokutuma vanhu kundogura musoro waJohani mutorongo.

¹¹Uye musoro wake wakauyiwa nawo uri mundiro ukapiwa kumusikana, iye akaenda nawo kuna mai vake.

¹²Vadzidzi vaJohani vakauya vakatora mutumbi wake vakandouviga. Vakazoenda vakandoudza Jesu.

¹³Jesu paakanzwa zvakanga zvaitika, akabvapo negwa zvisingazivikanwi nevazhinji akaenda kurenje. Vachinzwa izvi, vanhu vazhinji vakamutevera netsoka vachibva kumaguta.

¹⁴Paakabuda mugwa, Jesu akaona vanhu vazhinji, akavanzwira tsitsi uye akaporesa varwere vavo.

¹⁵Zvino ava madekwana, vadzidzi vake vakauya kwaari vakati, “Tiri musango, uye kwava kusviba. Endesai vanhu ava, kuti vaende mumisha vandozvitengera zvokudya.”

¹⁶Jesu akapindura achiti, “Havafaniri kuenda. Imi vapei chavangadye.”

¹⁷Ivo vakapindura vakati, “Pano tinongova nezvingwa zvishanu nehove mbiri.”

¹⁸Akati, “Uyai nazvo kuno kwandiri.”

¹⁹Uye akarayira kuti vanhu vagare pasi pauswa. Akatora zvingwa zvishanu nehove dziya mbiri akatarira kudenga akavonga, akazviropafadza uye akazvimedura. Ipapo akazvipa kuvadzidzi, vadzidzi vakapa vanhu.

²⁰Vose vakadya vakaguta, uye vadzidzi vakaunganidza zvimedu zvainge zvasara zvikazadza matengu gumi namaviri.

²¹Vanhu vakadya vaisvika varume zviuru zvishanu pasingaverengwi vakadzi navana.

²²Pakarepo Jesu akaudza vadzidzi vake kuti vapinde mugwa vafanotungamira kuenda kune rimwe divi, iye ndokusara achiendesa vanhu vazhinji ava.

²³Mushure mokuendesa vanhu vazhinji ava, akakwira mugomo ari oga kundonyengetera. Madekwana akasvika iye achingovako ari oga,

²⁴asi igwa rakanga rava chinhambwe chikuru kwazvo kubva kunyika asi richitambudzwa namasaisai nokuti mhepo yairwisana naro.

²⁵Panguva yechina yousiku Jesu akaenda kwavari, achifamba pamusoro pegungwa.

²⁶Vadzidzi pavakamuona achifamba pamusoro pegungwa vakatya kwazvo. Vakaridza mhere nokutya vakati, “Hero dzangaradzimu!”

²⁷Asi pakarepo Jesu akati kwavari, “Musatya, ndini!”

²⁸Petro akapindura akati, “Ishe, kana murimi ndirayirei kuti ndiuye kwamuri ndichifamba pamusoro pemvura.”

²⁹Iye akati, “Uya.” Ipapo Petro akabuda mugwa akafamba pamusoro pemvura akananga kuna Jesu.

³⁰Asi akati achiona mhepo ine simba, akatya, ndokubva atanga kunyura, achibva adanidzira achiti, “Ishe, ndiponesei!”

³¹Pakarepo Jesu akatambanudza ruoko rwake akamubata, uye akati kwaari, “Iwe wokutenda kuduku, sei wakahadzika?”

³²Uye pavakapinda mugwa, mhepo yakanyarara.

³³Ipapo vaya vaiva mugwa vakamunamata vachiti, “Chokwadi muri Mwanakomana waMwari.”

³⁴Kuzoti vayambukira mhiri, vakaburukira paGenesareti.

³⁵Uye varume venzvimbo iyoyo vakati vamuziva, vakatumira shoko mudunhu rose rakapoteredza. Vanhu vakauya navarwere vavo vose kwaari

³⁶vakamukumbira zvikuru kuti abvumire varwere kuti vangobata mupendero wenguo yake uye vose vakamubata vakaporeswa.