Read Bhaibheri Dzvene MuChiShona Chanhasi Mateo 22 Bible Online

Mateo 22 - Bhaibheri Dzvene MuChiShona Chanhasi bible

Mateo 22

¹Jesu akataurazve kwavari nemifananidzo achiti,

²“Umambo hwokudenga hwakafanana namambo akagadzirira mwanakomana wake mutambo wesvitsa.

³Akatuma varanda vake kuna avo vainge vakakokwa kumutambo kuti vachiuya, asi vakaramba kuuya.

⁴“Ipapo akatumazve vamwe varanda achiti, ‘Taurirai vose vakakokwa kuti ndagadzirira mabiko: Ndabaya nzombe nemombe dzakakodzwa uye zvose zvagadzirirwa. Uyai kumutambo wesvitsa.’

⁵“Asi hapana akateerera uye vakaenda mumwe kumunda wake, mumwewo kune rimwe basa rake.

⁶Vamwe vavo vakabata varanda vake vakavaitira zvakaipa uye vakavauraya.

⁷Mambo akatsamwa kwazvo. Akatuma hondo yake kundoparadza vaurayi vaya uye akapisa guta ravo.

⁸“Ipapo akati kuvaranda vake, ‘Mutambo wesvitsa wagadzirirwa asi vaya vandakakoka vakanga vasingakodzeri kuti vauye.

⁹Endai kumharadzano dzenzira mundokoka kumutambo ani zvake wamuchawana.’

¹⁰Saka varanda vakaenda mumigwagwa vakandokokorodza vose vavakagona kuwana, vose vakanaka nevakaipa, uye imba yesvitsa ikazara navakanga vakokwa.

¹¹“Asi mambo akati apinda kuzoona vakanga vakokwa, akaona munhu imomo akanga asina nguo yesvitsa.

¹²Akamubvunza akati, ‘Shamwari, wapinda seiko muno usina nguo yesvitsa?’ Munhu uya akashaya chokureva.

¹³“Ipapo mambo akaudza varanda vake akati, ‘Musungei maoko namakumbo mumukande panze, murima, umo muchava nokuchema nokurumanya kwameno.’

¹⁴“Nokuti vazhinji vakakokwa asi vakasarudzwa vashoma.”

¹⁵Ipapo vaFarisi vakabuda vakandoronga kuti vamubate namashoko ake.

¹⁶Vakatuma vadzidzi vavo kwaari pamwe chete navaHerodhi. Vakati, “Mudzidzisi, tinoziva kuti muri munhu akarurama uye kuti munodzidzisa nzira yaMwari zviri maererano nechokwadi. Hamutsauswi navanhu nokuti hamutarisi kuti ndivanaani.

¹⁷Tiudzei zvino kuti imi, munoti kudini? Zvakanaka here kutera mutero kuna Kesari kana kuti hazvina?”

¹⁸Asi Jesu, achiziva kuipa kwavo, akati, “Imi vanyengeri munondiedzereiko?

¹⁹Ndiratidzei mari inoshandiswa pakutera mutero.” Vakamuvigira dhenari

²⁰uye akavabvunza akati, “Ko, mufananidzo uyu ndowaani uye runyoro urwu ndorwaani?”

²¹Vakapindura vakati, “NdezvaKesari.” Ipapo akati kwavari, “Ipai kuna Kesari zvaKesari, uye kuna Mwari zvaMwari.”

²²Vakati vanzwa izvi, vakashamiswa. Saka vakamusiya vakaenda.

²³Pazuva rimwe chetero vaSadhusi, avo vanoti hakuna kumuka kwavakafa, vakauya kwaari nomubvunzo.

²⁴Vakati, “Mudzidzisi, Mozisi akatiudza kuti murume akafa asina vana mununʼuna wake anofanira kuwana chirikadzi agomuberekera vana.

²⁵Zvino pakati pedu paiva navanakomana vomunhu mumwe vanomwe. Wokutanga akawana mukadzi ndokubva iye afa, uye sezvo akanga asina vana, akasiyira mununʼuna wake mukadzi.

²⁶Zvimwe chetezvo zvakaitika kuno wechipiri nowechitatu kusvikira kuno wechinomwe.

²⁷Pakupedzisira mukadzi akazofawo.

²⁸Zvino pakumuka kwavakafa, achava mukadzi waaniko pavanomwe vaya sezvo vose vaiva varume vake?”

²⁹Jesu akavapindura akati, “Ndipo pamunorasika ipapo nokuti hamuzivi Magwaro kana simba raMwari.

³⁰Pakumuka kwavakafa vanhu havawani kana kuwanikwa, vachange vakaita savatumwa kudenga.

³¹Asi pane zvokumuka kwavakafa, hamuna kuverenga here zvakarehwa naMwari kwamuri, achiti,

³²‘Ndini Mwari waAbhurahama naMwari waIsaka naMwari waJakobho’? Haasi Mwari wavakafa asi wavapenyu.”

³³Vanhu vazhinji vakati vanzwa izvi, vakashamiswa nokudzidzisa kwake.

³⁴Vanzwa kuti Jesu akanga akunda vaSadhusi, vaFarisi vakaungana pamwe chete.

³⁵Mumwe wavo aiva nyanzvi pane zvemirayiro akamuedza nomubvunzo achiti,

³⁶“Mudzidzisi, ndoupi murayiro mukuru muMurayiro?”

³⁷Jesu akapindura akati, “ ‘Ida Ishe Mwari wako nomwoyo wako wose, nomweya wako wose nokufunga kwako kwose.’

³⁸Uyu ndiwo murayiro mukuru uye wokutanga.

³⁹Wechipiri wakafanana nawo unoti, ‘Ida muvakidzani wako sokuda kwaunozviita iwe.’

⁴⁰Murayiro wose naVaprofita zvakabatanidzwa pamirayiro iyi miviri.”

⁴¹VaFarisi pavakanga vachakaungana pamwe chete, Jesu akavabvunza akati,

⁴²“Munofungei nezvaKristu? Mwana waani?” Vakapindura vachiti, “Mwanakomana waDhavhidhi.”

⁴³Akati kwavari, “Ko, zvino sei Dhavhidhi achitaura noMweya akamuti, ‘Ishe’? Nokuti anoti,

⁴⁴“ ‘Ishe akati kuna Ishe wangu: Gara kuruoko rwangu rworudyi, kusvikira ndaisa vavengi vako pasi petsoka dzako.’

⁴⁵Zvino kana Dhavhidhi achimuti, ‘Ishe’ angagova mwanakomana wake sei?”

⁴⁶Hapana akagona kutaura shoko rimwe, uye kubva pazuva iroro zvichienda mberi hapana akazoshinga kumubvunza mimwezve mibvunzo.